GISUGDAN na sa kapolisan ang pagpangita sa usa ka notoryus nga kawatan human na-alarma na ang pipila ka mga tawo ning dakbayan sa Cagayan de Oro labi na ang mga nangabiktima niini mga propesyunal ug dunay mga opisina ug pipila ka mga opisina sa tunghaan.
Ang suspetsado dunay alyas nga Daniel Abayon ug Mark Louie Antigua, mipaila nga 18 anyos ug dunay cellphone number nga 09172497102 base sa mga rekord nga iyang ibutang sa mga klinika nga iyang nabiktima.
Modus operandi sa suspetsado ang magpaka-aron ingnon nga usa ka kliyente dala paniid sa mga kabtangan nga pwede makuha susama sa mga mahalong cellphone, ug kung malipat ang mga biktima, dayon kini niya kuhaon ug dali nga mohawa.
Sa natala sa Police Station 1, tulo na ka kaso sa pagpangawat nga nagtudlo sa suspetsado. Gani naabtan pa sa Sun.Star SuperBalita ang ika tulo nga mipatala kang Senior Police Officer-1 Allan Radaza, ang imbestigador sa istasyunan, nga usa ka empleyado sa usa ka restaurant nga mihangyo nga dili na lang panganlan niining mantalaan ug pangalan sa iyang gitrabahuan.
Base sa biktima, niadtong Martes mga alas 2:00 sa hapon dihang ang suspetsado miingon nga magpareserba og lamisa alang sa iyang mga higala nga mokaon apan ulahi na ang tanan sa dihang nadagit na ang iyang cellphone nga nagkantidad og lapas P10,000 nga giregalo pa sa iyang bana gikan sa gawas sa nasud.
Ug mga alas 4:00 sa maong adlaw, gikawatan usab ug cellphone ang usa ka doktora (mihangyo usab nga dili panganlan) sulod sa iyang klinika dapit sa dalang Velez nga mokantidad sa kapin P30,000, ug mao gihapon ang pamaagi sa suspetsado.
Matud ni SPO1 Radaza, unang natala nila ang kaso sa suspetsado tulo ka semana na ang milabay human gikawatan ang usa ka abogado sulod sa iyang opisina sa dalan Corrales.
Ug gawas pa niini, human gipakita ang hulagway sa suspetsado sa internet pinaagi sa Facebook, daghan usab mikompirma nga daghan na ang mga nabiktima ang maong suspetsado sa mga managlahing klinika, opisina ug tulonghaan.
“Mao man ni akong nakita nga mianhi sa opisina ug nangutana about sa mga gamit, unya nangutana kung naa bay gawasan lahos sa luyo,” ingon ni Rolando Lee III, usa ka estudyante sa Mindanao University of Science and Technology, human makita ang hulagway sa suspetsado.
