ANG pagpangatake nga gihimo sa mga rebeldeng New People's Army (NPA) nagpasabot lamang nga di sinsero ang mga rebelde sa pagtuman sa Comprehensive Agreement on the Respect for Human Rights and International Humanitarian Law (CARHRIL).
Kini ang pahayag ni 10th Infantry Division Philippine Army spokesperson Lieutenant Colonel Lyndon Paniza human nahitabo ang duha ka managlahing engkwentro tali sa militar ug rebeldeng grupo didto sa Compostela Valley Province.
"Their claims of being the defender of the civilians are apparently opposed by their own criminal and barbaric acts," ni Paniza sa iyang suwat pamahayag nga gipadangat sa Superbalita.
Niadtong Dominggo, gikapinusilay sa mga sakop sa 71st Infantry Battalion ang 70 ka mga sakop sa NPA didto sa Sitio Piasusuan, Barangay Napnapan, Pantukan, Compostela Valley Province.
Ang militar daling miresponde sa taho nga dunay mga armadong grupo nga nakigpulong sa katawhan mao nga miresponde ang tropa ni 1 Lieutenant Abelardo Silva, apan ilang nasugatan ang mga rebelde alas 4:00 sa hapon niadtong Dominggo.
Sa ilang panagsugat, nahitabo ang binakbakay nga miresulta sa pagkasamad sa unom ka mga sundalo lakip na si Silva.
Namatay sa maong engkwentro mao si Private First Class Guyre Puyao nga gikan pa sa lalawigan sa Benguet.
Mga NPA daling misibog dala ang ilang mga samarong kauban base sa mga dugo nga nakita sa dapit nga giagian sa mga rebelde.
Nakuha sa nahitaboan sa engkwentro ang handheld radios, cellular phones, personal nga butang ug subersibong dokumento.
Sa wa pa mahitabo ang engkwentro didto sa Barangay Napnapan, nagkabinakbakay sab ang mga sakop sa 25th Infantry Battalion ug ang 30 ka mga NPA didto sa Sitio Handuromug, Barangay Bayabas, Nabunturan, Compostela Valley Province.
Ang pinusilay nahuman sud sa 45 minutos nga miresulta sa pagkasamad sa wa masayri nga gidaghanon sa mga rebeldeng NPA. (AD/PR)