KIDAPAWAN CITY -- Gikompirma sa militar nga nakasinati na og kagutom ang mga miyembro sa New People's Army (NPA) sa kabukiran gumikan nahigmata na ang katawhan nga gihimo lamang silang gatasan sa mga rebelde.
Gibutyag ni 57th Infantry Battalion, Philippine Army commanding officer Colonel Nilo Vinluan nga mitiyabaw na ang mga sibilyan nga namuyo utlanan sa North Cotabato ug Davao Del Sur sa grabeng pagpangayo og revolutionary tax sa NPA nga daw gitulis na ang katawhan.
Mismo ang mga sibilyan na ang nangayo'g panabang sa kasundaluhan gumikan sa gihimong abuso sa mga rebelde sa kabukiran.
Bisan ang mga negusyante sa kapatagan nakadawat na og extortion letter gikan sa mga rebelde sa gipangayo nila nga protection money.
Kahinumdoman nga niadtong miaging adlaw, gironda sa 57th IB ang gitaguan sa mga rebelde sa Barangay New Sebu President Roxas North Cotabato, diin nakuha ang nagkadaiyang klase sa armas, mga bala, pagkaon, cellphone, IED, landmine, detonating cord ug medical kit.
Apil na ang payroll sa mga Cafgu uban ang P100 mil nga kuwarta nga nakuha sa NPA dihang ilang gibanhigan ug gipabuthan og landmine ang 38th IB nga maghatud unta og suweldo sa mga miyembro sa Cafgu.
Apil na niini ang listahan sa mga inilang tawo ug negusiyante nga gipangayuan og protection money sa mga rebelde.
Gikanayon sa usa ka alyas Ruben, usa ka negusiyante (bansagon gitago) nga kon dili sila mohatag sa mga NPA, sila na sab ang hulgaon nga patyon.
Ang NPA namahayag nga walay kamatuoran ang akusasyon sa militar gumikan ang ilang nadawat nga suporta sa katawhan kinasingkasing nilang gihatag. (Edgar Fuerzas)