Obenieta: Utong pa!

BAHALA na’g gaaligato ang espidno sa gawas basta bugnaw ang hunahuna ug pamati sulod sa panimalay. Ug kon mapalig-on unta kining pagtuo sa atong kabataan, diha ra ta makaingong nga nilampos kita sa atong katungdanan isip mga ginikanan: ang pagpatunhay sa banay isip mao’y una ug kataposang dangpanan nga sarang nang panalipod batok sa kaguliyang sa kalibotan.

Apan lupig pa’y luha ang lunop kon ang panimalay mao’y tuboran sa pagmahay. Kon kini mao’y panghitabo sa kabanayan, dayag nga igo ra pod kining gasamin sa pagkabuak sa katilingban. Private issues are public issues, matod pa sa usa sa mga pagtulon-an sa Sociology. Sa ato pa, ang pinahipi kun hiniposan nga mga hisgotanan—nga sagad tinagoan sulod mga bungbong sa pinuy-anan—angay pod dia’y kabalak-an sa kinabag-an. Maingon ta nga maaninaw nato ang kagidlay sa gawas kon unsa’y kagubot sulod sa balay.

Pananglitan, kon ngitngit ang nasudnong kahimtang—gilapawan sa nalamaw nga kawad-on—nagkaawop pod kasagaran ang kahayag ilawom sa matag atop sa kasilinganan. Kon galisod ug gaalindasay ang nasod, alangan man pod og haruhay ug linaw ang pagpuyo sa kadaghanan.

Lupig pa nato’y mga wala’y buot kon padayon tang gamay ug talawan sa dagkong mga suliran. Unsaon nato pagtubo ug paglambo kon dili ta motupong ug makigharong batok sa atong kahuyang—gibahak na!—pagtuman sa tahas nato pag-amuma sa atong mga anak?

Pastilan, ang tubag niana lagmit nasangit sa gadiwalwal nga dila sa usa ka 13-anyos nga gikatahonggahikog sulod sa balay sa iyang apohan didto sa usa ka barangay sa dakbayan sa Naga bag-ohay lang. Gihigtan ni inday ang iyang liog kay kuno “nabuntisan sa iyang adik nga amahan.”

Nabutyag sa iyang suicide note nga walo sila ka managsuon ug gabuwag na ang iyang mga ginikanan. Tin-aw ang kutaw sa kayugot ug kaguol diha sa iyang gisuwat: “Demonyo ni nga pamilya…”

Pesteng yawa! Mao pod tingali ni ang pamalikas isip pagbuyag sa gabutyag nga ang mga butakal nga gapataas sa ilang ikog ug sungay samtang gatagbaw sa ilang uwag sa unod sa mga linghod. Nikuyanap na kuno dinhi sa Sugbo ang kagaw sa child pornography, matod pa sa nabalaka nga kahugpongan sa Children’s Legal Bureau (CLB), Bidlisiw Foundation, and the Fellowship for Organizing Endeavors (Forge). Gipadayag nila nga galaway ang mga langyaw pinaagi sa Internet diin law-ay nga gapasundayag ang mga bata nga gitugotan kuno sa ilang ginikanan aron makasapi tadlas sa ilang kawad-on.

Pakgangon ang pagtukob sa mga bata! Kini ang hagit sa gapasiugda sa kalihokan nga gitawag og “Sugbo! Lihok Batok sa Pornograpiya: Cebu-wide Day to End Child Pornography” nga giapilan sa mga tunghaan ingon man sa mga galangkob sa civil so­ciety ug local governments.

(geemyko@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph