P1 M nga balor sa peke nga relo nasakmit

DUL-AN P1 ka milyon nga kantidad sa giduda­hang mga mini nga relo de pulso ug underwear sa mga babaye ang gisakmit ug gi-hold sa hiniusang operas­yon sa Coast Guard Cebu Station, Naval Intelligence Support Group ug Bureau of Customs gikan sa usa ka negusyante nga Turko alas 7:30 kagahapon sa buntag sa pier 6, dakbayan sa Sugbo.

Si Cebu Coast Guard Station Commander Rolando Lizor Punzalan nibutyag nga moabot sa 3,229 ka buok mga relo de pulso nga branded og tatak apan gidudahan nga mga mini ang nasakmit sa operasyon nga gisulod sa mga Tupperware nga gisulod sa lima ka dagkong mga bag.

Ang mga bag gipanag-iya ni Sanjay Kalra, 30, usa ka Indian national nga nagnegusyo og buy and sell nga nagpuyo sa Sikatuna, corner Echavez st., siyudad sa Sugbo.

Gawas sa lima ka mga bag, nakuha usab gikan sa negusyante ang duha ka dagkong mga bag nga puno og mga bateriya sa relo nga Quartz, usa ka bag nga puno usab og mga panty ug bra ug laing duha ka mga bag nga dunay sulod nga mga personal nga butang.

Si Punzalan niingon nga way napakita nga resibo o mga dokumento si Kalra sa iyang pagkanaug sa barko nga gikan sa Cagayan de Oro hinungdan nga gisakmit ang gidala niini nga mga kargamento.

Apan ang maong langyaw nanalipod nga consignment ang tanan hinungdan nga wa siya’y napakita nga mga dokumento.

Apil sa mga brand sa relo nga nangasakmit ang Citizen, Quartz, Speed, Rado ug Seiko.

Si Punzalan niingon nga ang tag-iya sa mga butang nibanabana nga nagkantidad ang tanan og P800,000, apan base sa ilang pagbanabana moabot og P936,125 ang kinatibuk-ang market value niini.

Ang maong opisyal nitug-an nga nakadawat sila og tip gikan sa ilang mga intelligence operative labot sa kadudahang mga kargamento nga dala sa langyaw nga negusyante gikan sa Mindanao.

Apan ang mga kauban ni Kalra nga dali nga niadto sa Coast Guard Cebu Station nipasabot nga karon pa kini makasuway pagsulod sa negusyo nga buy and sell.

Matod nila nga miyembro sa kahugpungan sa mga magpapatigayon sa mga Indian national si Kalra ug napakyas lang pagkuha og mga dokumento sa iyang gidala nga mga kargamento.

Human sa inventory, i-turnover sa Coast Guard ngadto sa Bureau of Customs (BoC) ang nasakmit nga mga butang apil na si Kalra.

Kalapasan sa intellectual property rights ug kapakyas pagbayad og buhis ang mga kasong posibleng atu­bangon ni Kalra.

Matod ni Punzalan ilang gitugyan ngadto sa BOC ang paghimo og tukmang lakang labot sa nahimong kalapasan sa negusyante labi na kon sakmiton ba niini ang maong mga butang pabor sa kagamhanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph