P1.4 milyones halin sa bulawan gisibat

TAGUM CITY -- Gisibat sa usa ka empleyado sa Golden Dove Goldsmith (GDG) ang 1.4 milyones pesos nga halin sa mga bulawan nga iyang gibaligya sa Central Bank, siyudad sa Davao niadtong miaging tuig.

Ang suspek mao si Wilfred Duyag, base sa pahayag ni Marife Garciano, 43, minyo, molupyo sa Barangay Visayan Village, Tagum City.

Si Garciano midangop sa Tagum City Police Station alas 10:00 sa buntag niadtong Sabado aron ipahibalo nga mokiha batok sa sa suspek.

Sumala ni Garciano nga katapusang misulod sa trabaho si Duyag niadtong Enero 18 ug dihang gipangitaan na sa halin sa bulawan nga gibaligya, wala na magpakita ug nagtagu-tago na ang suspek.

Gibutyag ni Garciano nga igo lang siyang gimanduan sa tag-iya sa Golden Dove Goldsmith nga si Eliezer Tayong nga ipatala ang maong hitabo sa kapulisan.

Nasayran nga ang halin sa bulawan gikapital sa suspek sa iyang negusyo mao nga misaad siya nga iyang bayaran.

"Giinvest nako ang kwarta, sa akong pagpalayo karon wala ko magtagu-tago para likayan ang problema, bisan pa ipa-wanted ko ninyo, Te, paningkamotan gyud nako nga mailisan jud nako," pahayag ni Duyag pinaagi sa mensahe sa text.

"Mohangyo lang ko nga akong motor diha maoy idata nako ug basin magpadala ko P30 mil kada bulan," dugang niya.

Giingon nga ang maong kantidad maoy halin sa bulawan nga iyang gibaligya sa Central Bank niadto pang buwan sa Hulyo 2011. (Teddy Cabana)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph