P2.50 nga umento sa plite sa dyip gisuportahan sa APL

NAKAKUHAG suporta gikan sa usa ka dakong pundok sa mga mamumuo ang gipangayo nga P2.50 nga umento sa plitehan sa Cebu Integra­ted Transport Service Cooperative (Citrasco) alang sa mga dyip pasaheroan sa Sugbo sa Land Transportation Franchi­sing and Regulatory Board (LTFRB).

Si Jose Tomongha, chairperson sa Alliance of Progressive Labor (APL)-Visayas, namahayag nga makatarunganon ang gipangayo nga usbaw sa Citrasco tungod kay nisaka ang presyo sa spare parts ug abangan sa sakyanan.

“Makatarunganon na kay ang mga drayber ug operator nanganihanglan man usab og umento kay di lang ang gasolina ang nisaka hasta ang spare parts ug abangan,” dugang niya sa pakighinabi sa Sun.Star Superbalita.

Matod ni Tomongha kon di uyonan sa Natio­nal Wages and Producti­vity Commission ang ilang apelar labot sa gia­probahan nga P13 nga cost-ofliving allowance alang sa mga trabahante nga magdawatan og mi­nimum nga suholan, ilang gamiton nga basehanan ang petition for fare increase sa Citrasco.

Siya nipasabot di a­llowance kon di umento sa sweldo ang angay ihatag sa mga mamumuo sa Central Visayas sama sa gipatuman sa ubang mga rehiyon sa nasod tungod kay nimahal ang presyo sa nag-unang palaliton ug nilambo usab ang ekonomiya sa tungatungang Kabisay-an.

Sud ning semanaha, iduso na sa The Living Wage Coalition, diin sakop ang APL, ang apela­syon ngadto sa NWPC.

Nasayran, ang Citrasco nihangyo sa LTFRB nga himuon nga P10 ang minimum nga plitehan sa PUJ apan wa pay gitakda nga adlaw kon kanus-a dunggon ang petisyon. (SCG)