NAABOT na kagahapon sa buntag sa Los Angeles, USA si Manny Pacquiao aron adto na ipadayon ang iyang hugot nga ensayo alang sa ilang rematch ni American Timothy Bradley Jr.
Ang rematch gikatakda karong Abril 12 sa MGM Grand Garden Arena sa Las Vegas, USA.
Ipahigayon sa Wild Card gym ni trainer Freddie Roach ang 2nd half sa training sa Pambansang Kamao sa Pilipinas. Gisugdan ni Pacquiao ang iyang ensayo sa Pacman Wild Card gym sa General Santos City.
“We had a great camp in the Philippines, and Manny, as usual, is way ahead of schedule in his conditioning, and very motivated,” batbat ni Roach sa interbyu sa www.philboxing.com.
“The real business begins for us on Monday at the Wild Card. We have great sparring waiting for Manny.”
Sa rematch, bawion og suway ni Pacquiao ang World Boxing Organization (WBO) welterweight title nga giilog ni Bradley gikan kaniya pinaagi sa kontrobersyal nga split decision nga kadaugan niadtong Hunyo, 2012.
“(Manny) wants that title back,” dugang ni Roach. “If Bradley thinks he’s going to see the compassionate Manny he saw the first time they fought, he is in for a very big surprise.”
Gusto sab ipamatuod ni Pacquiao aduna pa siya’y saktong ikabuga ug wala pa nibahar ang iyang kusog ug abilidad sukwahi sa katahap sa uban.
Gisaad ni Roach ngadto sa mga media ug mga fans nga midumog kanila sa pagsugat didto sa Los Angeles International Airport nga aduna na silay bag-ong game plan alang ni Bradley.
“Please tell Mr. Bradley it’s a whole new ballgame,” matod ni Roach. “Manny means business this time.”
Si Pacquiao (54-5-2, 38 KOs), 35-anyos, mipukan ni Brandon Rios pinaagi sa unanimous decision batok ni Brandon Rios niadtong Nobiyembre. Samtang si Bradley mipildi usab Juan Manuel Marquez pinaagi sa split decision niadtong Oktobre. (ESL)