Pacquiao nakapili na og kontra

SA sitwasyon nga mapalpak na sab ang negusasyon sa gikaintapang panagharong nila ni Floyd Mayweather Jr., si pound-for-pound champion Manny Pacquiao mipabuhagay nga nakapili na siya kon kinsa iyang kontrahon isip hulip sa kontrobersyal nga Amerikanong boksidor.

“I’ve chosen my next opponent,” batbat ni Pacquiao sa interbyu sa www.abs-cbnnews.com.

Wala pa hinuon gibutyag ni Pacquiao kon kinsa ang iyang napilian. Ang iyang promoter nga si Top Rank boss Bob Arum maoy opisyal nga moanunsyo niini sa higayon nga mosurender na kini sa pagpakignegusasyon sa kampo ni Mayweather.

Naa ra gyud nila ni Miguel Cotto, Juan Manuel Marquez, Tim Bradley, ug Lamont Peterson ang napili sa Pambansang Kamao sa Pilipinas.

Kon si Cotto ang napili ni Pacquiao, hayan gituohang mapahigayon ang away karong Hunyo 9 sa Thomas and Mack Center o MGM Grand sa Las Vegas, bespiras sa Puerto Rico Day parade.

Gipahibalo nang daan ni Arum nga prayoridad gyud gihapon nila si Mayweather ug kon madayon ang away, hayan ipahigayon kini sa ulahing bahin sa Mayo o Hunyo 9.

Apan daw kuli kining mahitabo kay ang gusto gyud ni Mayweather nga petsa mao ang Mayo 5 unya gawas pa, mibalibad sab kini nga himuong 50-50 ang bahinay.

Gitino ni Arum nga wala gyu’y kamatuoran nga siya maoy babad aron madayon ang away nila ni Pacquiao ug Mayweather.

“I’m not stopping any fight. This is all for public relations, it’s nonsense. Arum’s blocking the fight and so on, it’s just ridiculous. What’s going on is not rational,” asoy ni Arum sa interbyu sa www.examiner.com.

“This is not the normal way you put together a big fight. The normal way would be for us to sit down somewhere. Mayweather said he won’t agree to a 50-50 split with Manny. Now that’s something blocking the fight, something we won’t agree to.”

Sa iyang bahin, asoy ni Pacquiao nga dili ra siya magproblema kon dili na sab madayon ang ilang away ni Mayweather.

“Okay lang. May iba pa namang fights,” asoy ni Pacquiao, kinsa miangkon nga gitawgan gyud siya ni Mayweather sa telepono.

Sa ilang kapin sa duha ka minutos nga panag-estorya, matod ni Pacquiao nga ang unod niini mao ang kabahin sa 50-50 nga bahinay ug petsa sa away nga pulos pa gyud wala masulbad.

Sa interbyu sa www.sportscenter.com, nagkanayon si Mayweather nga dili mahitabo ang 50-50 ug iya lang gisultihan si Pacquiao sa ilang panag-estorya sa telepono nga: “But what can happen is you (Pacquiao) can make more money fighting me than you have made in your career.”

“I also let him know I’m in control on my side but he needs to get on the same page as his promoter so we can make this fight happen.”

Apan gikatahong wala mosanong si Pacquiao niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph