USA ka patay'ng lawas ang nakaplagan sa usa ka mananagat daplin sa dagat sa San Juan, Barangay Centro, R. Castillo, Agdao, dakbayan sa Dabaw alas 4:30 sa kaadlawon niadtong Lunes.
Ang patay'ng lawas nailhan pinaagi sa nakitang lisensiya nga mao si Victor Torres Calledo, 68, taga Bunawan ning dakbayan.
Sa gihimong imbestigasyon ni Senior Police Officer 1 Restie Tan sa Sta. Ana Police Station, gihulagway nga ang biktima nagsul-ob og Lavender nga sando ug kolor Blue ang pantalon sa dihang nakit-an sa usa ka mananagat nga si Alfredo Cabisas, 58, minyo, taga San Juan, Barangay Centro, Agdao daplin sa dagat sa maong lugar nga nagkulob.
Nahibaw-an usab gikan kang Police Inspector Atilano Fabella sa Scene Of the Crime Operatives sa Philippine National Police nga si Calledo nakahiagum og bun-og sa ulo.
Daling gidala sa Angel Funeral Homes ang patay'ng lawas sa biktima aron nga mapailawom sa otopsiya.
Hangtud sa pagsuwat ning balita, gihulat pa sa mga otoridad ang resulta sa otopsiya nga maoy maka-determinar sa tinuod nga hinungdan sa kamatayon sa biktima. (Blue Cordero)