‘Payong-payong’ driver gipatay

PATAY dayon ang usa ka “payong-payong” driver human siya gipusil sa usa ka tawo nga nagsunod kaniya sakay sa motorsiklo didto sa Libby Road, Barangay Bago Gallera, siyudad sa Davao niadtong Dominggo.

Namatay mao si Aurelio Galaites, 38, trabahante sa Iluminada Farms, nagpuyo sa Sitio Nalum, Purok 5, Barangay Bago Gallera, ning siyudad.

Base sa spot report sa Talomo Police Station, ang biktima nagmaneho sa iyang motorsiklo nga dunay side car kauban ang iyang asawa nga si Juvie Galaites.

Ang magtiayon gikatahong gikan sa Sitio Nalum paingon didto sa Crossing Puan, apan dihang miabot sila atubangan sa Valle Store kalit siyang gipusil sa mamumuno.

Nasayran nga gisundan ang biktima sa mamumuno, kinsa nagsakay og motorsiklo, apan dihang miabot sila sa maong lugar, miuna ang mamumuno dayon gipusil ang biktima tumong sa iyang ulo.

Milapus ang bala sa tuong dalunggan sa biktima mao nga nahulog siya sa iyang gimaneho nga motorsiklo hangtud nga namatay.

Ang mamumuno giingon nga daling nahanaw sa panan-aw sa mga tawo nga nakasaksi sa panghitabo.

Mga kabanay sa biktima daling miresponde sa maong lugar dayon ilang gipahiluna ang patay nga lawas sa biktima didto sa Toril Community Cooperative Funeral Homes.

Nakuha sa mga operatiba sa Scene of the Crime Operatives (Soco) ang usa ka basiyo sa bala sa .45 kalibre nga pistola nga maoy gigamit sa mamumuno.

Mga imbestigador sa Talomo Police Station naningkamot karon nga mailhan ang mamumuno aron sikupon ug pasakaan og kaso ngadto sa korte. (Alger Dura)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph