KIBLAWAN, Davao del Sur -- Usa ka sakop sa Peace and Development Team (PDT) sa 39th Infantry Battalion sa Philippine Army ang naigo human gibanhigan sa di pa matinong ihap sa mga armadong lalaki didto sa Sitio Aliong, Huwebes.
Gitug-an ni Lieutenant Colonel Norman Zuniega, 39th IB commanding officer, kagahapong adlawa, nahitabo ang panagtagbo ala 1:40 sa hapon.
Sumala ni Zuniega, ang PDT gipangulohan ni Sergeant Angelo Barotas nga mihimo og survey sa mga molupyo sa Sitio Aliong aron ihatag ngadto sa mga benepisyaryo ang 50 ka sakong liso sa mais ug patatas nga igtatanum.
Gikan sa Kagamhanang Probinsiyal ang mga semilya ug gihatag ngadto sa mga molupyo sa lugar.
"A few minutes from the troops' arrival, they were fired upon by more or less 10 members of armed men coming from four different directions," matud ni Zuniega.
Hinuon, daling nakabalos sa pagpabuto ang kasundalohan ug milungtad sa 20 minutos ang binakbakay.
Apan, gidason ni Zuniega nga naigo sa bala sa mga armado si Private Jephil Jalalon, kinsa daling gitambalan.
"It is unfortunate and sad that our soldiers were harassed while serving the people. Our troops were there to conduct peace and development operations as part of helping the government developmental efforts," panapos ni Zuniega.