PEACEFUL exit maoy gihangyo sa kampo nila ni Engr. Augusto Corro ug Dr. Jose de Leon ngadto nila ni Mayor Sun Shimura ug Vice Mayor Ma. Luisa Loot sa lungsod sa Daan Bantayan samtang sila nagtinguha na sa pag-take over sa munisipyo karong semanaha.
Apan taliwa sa ilang panawagan nga ipatuman ang kalinaw bisan pa sa pagtumaw sa tensiyon, ila hinuong nabati nga gi-terrorize sila tungod sa gipadalang mga pulis sa ilang lungsod nga gikuwestyon usab nila kon kini duna bay pagtugot gikan sa Commission on Elections.
Atol sa gipahigayong prayer rally kagahapon sa compound sa pinuy-anan ni Corro sa lungsod, gipahibawo niini ang pag-take over na nila sa munisipyo karong semanaha.
Ang rali gipahigayon sa compound ni Corro aron kalikayan ang kagubot.
“I really like to avoid something untoward to happen kay with the statement of Malou (Vice Mayor Loot) magkasamok. I don’t think diri sa among compound magkagubot,” matod ni Corro.
Gihuwat lang nila nga ma-serve ang writ of execution nga una nang giluwatan ni RTC Bogo Judge Antonio Marigomen.
Apan matod ni Mayor Sun Shimura nga di ang writ of execution gikan sa korte kon di ang gikan lang sa Comelec en banc ang mahimo nilang tumanon.
Ang writ of execution sa korte wa mapatuman human nisang-at og petition for certiorari sila si Shimura ug Loot kay nakakuha sila og temporary restraining order ug injunction gikan sa Commission on Elecion (Comelec) first division.
Apan ang Comelec nipagawas og desisyon niadtong Pebrero 17 nga naglibkas sa ilang giluwatang injunction maong matod ni Corro wa nay babag sa ilang paglingkod.
Matod niini nga ilang gitahod ang katungod sa mga Loot nga moduso og motion for reconsideration apan di kini makapakgang sa ilang paglingkod na.
Ang rally nga gitambongan sa di mominos usa ka libong mga supporter gitumong aron ipahibawo ang desisyon sa Commission on Election first division ug aron usab sa pagpasalamat sa kadaugan.
Dihang gipaila si Corro, malanog nga pakpak gikan sa mga supporter uban sa pagpabuto og fireworks ang nisugat kaniya.
Sa iyang pakigpulong, gipanawagan ni Corro nga magpabiling kalma ug likayan ang kagubot ug mosubay lang sila sa proseso.
Naobserbahan hinuong kalmado ang iyang mga supporter. Ang rally nga gisugdan alas 2 sa hapon natapos mga alas 3:30 sa hapon.
Gisaway ug gikuwestyon hinuon ni Corro ang kadagkuan sa kapulisan sa pagpadala og mga sakop sa SRU sa ilang lungsod nga unta wa man sila mohimo og kasamok.
“Nganong gipadad-an man ta og kapulisan. Ila tang gi-terrorize ta. Gusto nilang himuon tang Maguindanao? I appeal to Vic Loot, if you’re a gentleman and an officer, di ni nimo buhaton,” padayag pa ni Corro.
Nipasangil sab siya nga ang sakyanan sa ilang supporter gibabagan sa tawo ni Loot ug daghan pang checkpoints.
Apan, si Daanbantayan police chief, Chief Insp. Laurel Almirante, niingon nga schedule gyud nila ang pagpahigayon og checkpoints.
Samtang pipila sa mga supporter sa mga Loot ang nagtukaw usab sa munisipyo ug sa pagduaw sa mga tigbalita, naabtan si Shimura nga niduaw kanila.
Gipasalig ni Shimura nga di sila mohimo og kasamok apan iyang gibahad nga kon mopugos gyud si Corro sa pag-take over, modepensa ra sila.
Matod niini nga mobiya lang sila sa puwesto kon ang moluwat og writ of execution mao ang Comelec en banc kay di nila ilhon ang writ of execution sa korte.
Sa mga supporters nga nitambong sa rally ni Corro, matod ni Shimura nga mga hinakot kini ug susama lang kini sa gidaghanon kon mopahigayon sila og mga pulongpulong sa mga barangay. (CPL)