PHO mipatay sa mga langaw

GIPAMATAY sa mga tinugyanan sa Provincial Health Office pinaagi sa misting o pagpasirit og tubig ug kemikal ang mga langaw nga nihugpa sa pipila ka kabalayan sa Sitio Buswang, Barangay Old Bago sa lungsod sa Asturias kagahapon.

Si Asturias Mayor Alan Adlawan nagtuo nga dunay nagpaluyo nga pulitiko sa pagpakatap sa istorya nga giatake sa mga langaw ang pito ka mga barangay sa ilang lungsod.

“I’m always accused of everything. Politics is boiling in this municipality,” padayag sa mayor dihang nahinabi sa Sun.Star Superbalita kagahapon.

Apan siya niangkon nga ang ilang munisipyo ang usa sa mabasol sa pagkatap sa mga langaw gumikan sa pag-apudapod og mga iti sa mga manok gikan sa mga poultry farm nga nahimotang sa ilang lungsod, ngadto sa mga mag-uuma.

Matod niya ang mga iti sa manok gigamit nga fertilizer sa mga mag-uuma nga nananom og mga mais.

Samtang ang Department of Health (DOH) 7 niingon nga alarming ang pagkatap sa mga langaw, apan maghuwat pa sila og feedback sa PHO.

Matod ni Renan Cimafranca sa Regional Epidemiology and Surveillance Unit (RESU) nga makahimo sila og short ug long term solutions.

Ang mga sakop sa PHO pinangulohan ni James Cañete, supervising sanitarian, nipahigayon og misting operation sa mga balay nga ningreklamo nga gihugpaan sa daghang mga langaw sa Barangay Old Bago.

Mga misting chemical nga gibutang sa mist blowers o misting machines ang gigamit nila ni Cañete pagpatay sa mga langaw.

Ang balay ni Alicia Dablo, molupyo sa dapit, ang usa sa gipahigayonan og misting human siya nireklamo nga daghang mga langaw ang nikatap sa ilang lugar sukad gitukod ang poultry farm.

Siya nireklamo nga nagkatolkatol ang iyang panit nga iyang gituohan nga mugna sa mga langaw.

Si Cañete nipaneguro nga dili sobra ka toxic ang kemikal nga ilang gigamit sa misting apan epektibo kini sa pagpatay sa mga langaw.

Si Adlawan nagduda sa motibo sa mga molupyo nga mireklamo tu­ngod kay matod niya han-ay kini ug adunay mga hulagway ug video.

Siya nahibulong usab sa kadaghan sa mga namirma sa reklamo nga niabot og 130 ka mga pirma nga nadawat sa iyang buhatan niadtong Lunes.

u201cNag-wonder ko daghan ang namirma nga sitio ra man na didto, way daghang balay didto,” dugang niya.

Sa inspection sa sanitary inspector sa lungsod nga si Rodulfo Flora, wa siya’y nakitang kalapasan nga nahimo ang tagdumala sa Cebu TH Poultry House.

Apan siya nirekomendar sa tag-iya nga hipuson ang mga kahoy nga nagtipun-og sud sa compound sa poultry farm.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph