Piniriso naghikog, patay

GIHUNOS sa usa ka bana ang iyang kaugalingon nga kinabuhi sulod sa prisohan niadtong Biyernes sa Libona Police Station sa Libona, Bukidnon human desidido ang asawa nga ipadayon ang kasong pagpangulata.

Nakaplagan nga naghikot og pisi sa iyang liog si Fidel Gabelin, 61, taga Crossing Libona, sa susamang lungsod hinungdan sa kakurat sa mga polis nga nag-duty niadtong tungora.

Gibutyag sa mga polis sa Libona nga ilang gisikop si Gabelin niadtong adlawng Miyerkules tungod sa pagpangulata niini sa iya mismong asawa.

Ang asawa desidido nga pasakaan og kaso ang iyang bana tungod kay kanunay na buhaton niini ang pagpanukmag kaniya.

Gituohan sa mga polis nga na-depress ang biktimang piniriso tungod sa pagtuong dili na gyod kini makagawas sa prisuhan hinungdan nga gihunos na lamang ang iyang kaugalingon pinaagi sa paghikot og pisi nga gihikot ang tumoy sa selda ra usab.

Gani dihang gipapriso kini sa iyang asawa niingon ang asawa nga dili na siya makapasaylo tungod kay kanunay na lamang siya nga mopasaylo niini panahon siya kulatahon.

Wala nay kinabuhi nga nakaplagan si Gabelin ug ning panahona nakurat pag-ayo ang asawa sa gihimo sa iyang banang pagpakamatay.

Related Stories

No stories found.
SunStar Publishing Inc.
www.sunstar.com.ph