Prisohan gisulong, 3 patay; 15 angol

KIDAPAWAN CITY - Tulo ang patay samtang 15 ang naangol dihang gisulong sa mga sakop sa lawless Moro Islamic Liberation Front (MILF) ang Kidapawan City Jail alas 9:30 sa gabii niadtong Domingo.

Mga namatay mao sila Carlos Sevilla, Mark Anthony Morales ug Benny Balmejano samtang naangol sila Ernie Aquire, Adrales Cabriles, Elvin Dulay, Raffy Yusalan, City Fire Marshall Police Supt. Romeo Tactaquin, Jomar Lizardo, Esmael Dapan, Rizardo Dapan, Altimogen Lao, Fire Officer 1 Jeffrey Alonzado, Fire Officer 2 Joel Litada, Roel Carbonel, Mark Loquie Pacana, Ian Albete ug Fire Officer 1 Jonathan Cornejo.

Gibutyag ni Cotabato Police Provincial Office director Sr. Supt. Cornelio Salinas nga gipabuthan sa mga armado ang City Jail gamit ang Rocket Propelled Grenade (RPG) nga mitugpa sa steel gate sa maong prisohan.

Suma ni Salinas nga nakigpinusilay ang mga jail guards sa kapin singkwenta ka mga armado kinsa daling miikyas dihang miabot ang kapulisan ug militar.

Mga rebelde mipaingon didto sa Barangay Muan duol na sa til-anan sa Mt. Apo.

Pipila lang ka minuto ang milabay, mibusikad na usab ang usa ka Improvised Explosive Divice (IED) nga gama sa bala sa 81 mm mortar atubangan sa buhatan sa Bureau of Fire Protection unahan lamang sa City Jail.

Mga samaron daling gidala sa Kidapawan Doctors Hospital ug Kidapawan Medical Specialist.

Kasagaran sa mga namatay ug naangol kadtong mga sibilyan nga daling nagsusi sa lugar human miikyas ang mga rebelde.

Dugang ni Salinas nga plano unta nga luwason sa mga rebelde si Datucan Samad, alyas Kumander Lastikman nga kanhi sakop sa 108th Base Command nga nadakpan niadtong Disyembre 23, 2012.

Si Lastikman nabilanggo tungod sa pagkalambigit niya sa highway robbery hold-up, extortion, carnapping, multiple murder, multiple frustrated murder, kidnapping ug pagpamomba.

Gilutos na karon sa militar ug kapulisan ang mga rebelde nga nagtago sa Mt. Apo. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph