Pulis nangita sa nagpatay

DIGOS CITY -- Padayon nga gipangita sa kapulisan ang nagpusil patay sa usa ka construction worker, kinsa miduaw sa sementeryo niadtong Biyernes sa gabii.

Ang biktima naila nga si Teburcio Gabcillo, 42, molupyo sa dalang Aurora 3rd, sakop sa Barangay San Jose.

Nasayran sa imbestigasyon sa kapulisan sa Digos City Police Office (DCPO) nga nahitabo ang krimen alas 9:00 sa gabii sa maong adlaw samtang pauli na unta ang biktima sa ilang balay.

Sumala pa nga sakay si Gabcillo sa iyang motorsiklo nga XR 200 sa dihang nahitabo ang pagpamusil.

Nahitabo ang insidente atubangan mismo sa balay sa biktima sa wala pa mailhing mamumuno.

Gihulagway sa mga nakasaksi nga duha ka mga lalaki nga sakay og motorsiklo maoy mipatay sa biktima ug misibat gilayon human mahimo ang krimen.

Unom ka mga samad pinusilan ang nahiaguman sa biktima sa nagkadaiyang bahin sa lawas.

Narekober sa kapulisan gikan sa nahitaboan sa krimen mao ang unom ka mga basiyo sa bala sa di pa matino nga kalibre sa armas nga gituohang maoy gigamit sa pagpamusil. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph