NAMUAK og rekord si Mereeis Ramirez sa iyang paglampos sa 3rd All-Women Ultra Marathon (Awum) 50K Run nga nanukad sa Cebu Capitol grounds ug nahuman sa Alta Cebu Village Resort and Convention sa Cordova, Cebu kagahapon.
Sa 245 ka babayeng runners nga nakatubag sa starting gun, nipatigbabaw si Ramirez pinaagi sa oras nga 4:38:27, nga una kaayo kumpara sa kanhi rekord sa lumba nga 5:10.
Nagsunod kang Ramirez mao sila si Sandra Soliano (4:43:34) sa ikaduhang dapit ug Jennifer Sabela (4:55:05) sa ikatulong dapit.
Si Preciosa Sanchez (5:14:26) maoy miangkon sa ikaupat nga dapit samtang ang natangtangan og korona nga defending champion nga si Jade Abellana (5:15:18) igo lang milabni sa ikalimang puwesto.
Ang mga nakakompleto sa top 10 mao sila si Virginia Parajenog (5:15:47), Jennefer Catublas (5:19:22), Wilma Lugay (5:19:32), Mary Luz Shimizu (5:21:10), ug Path Torremoro (5:23:50).
Ang lumba, nga tipik sa pagsaulog sa International Women’s Month karong buwana karong buwana, mihatag og duha ka special awards. Kini ang Miss Stunning Runner ug Pakigol awards.
Midaog sa Miss Stunning award mao si Sunshine Cunanan samtang si Jade Abellana maoy midawat sa Miss Pakigol.
“Very successful,” daling tubag ni race director Willie Estepa dihang gikumusta ang dagan sa lumba.
“Taas kaayo ang percentage sa atong finishers. Out of 245 runners nga naka-start, 243 ang nakahuman sa race,” pasabot ni Estepa.
Malaumon si Estepa sa mas dako ug malampuson nga lumba ang mapahigayon sa sunod tuig. (ESL)