SA TINGUHA nga mapalaw-man ang ilang ilawom nga bahin nakuha sa Alaska Milk si Vic Manuel gikan sa Air21 baylo sa ilang shooter nga si Aldrech Ramos.
Wa man tuod ma-finalize ang kasabutan apan nagkauyon na ang duha ka kampo kalabot niini ug karong adlawa isumiter na ngadto sa PBA Commissioner’s Cup Office ang mga papeles alang sa pag-approved niini.
Si Manuel, bisan pa man og kuwang sa gidak-on sa iyang position apan nakapamatuod na kini sa iyang kapabilidad ubos sa Air21 ug sa GlobalPort.
Sa maong trade magkuyog sila og balik ni coach Luigi Trillo nga maoy iyang coach sa D-League sa Cebuana Lhuillier. Matod pa nga taodtaod nang tinguha ni Trillo si Manuel kinsa iyang gilauman nga makatabang sa iyang sinaligan nga si Sonny Thoss. Makauban na sa kanhi MVP sa D-League sila si Gabby Espinas, Nic Belasco, Eddie Laure ug Calvin Abueva sa ilawom nga bahin ning pagdepensa sa Alaska sa ilang Commissioner’s Cup title.
Sa iyang bahin, ang Air21 maoy ikatulong team ni Ramos kinsa nakuha sa San Mig ug Alaska ug padayon pa kining nanglimbasog nga mahibalik ang iyang dinuwaan nga nakapahimo niyang standout panahon sa iyang college days. (JBM)