Rebultan: Children’s Month

USA sa gisaulog matag bulan sa Oktubre mao ang Children’s Month aron pag-rekognisar unsa ka importante ang kabataan hilabina ang pagdumdum sa ilang mga katungod batok sa pang-abuso.

Kini ang gihatagan ug pagtagad sa Gugma Sa Kabataan (GSK) usa ka non-government organization (NGO) nga miamuma sa mga kabataan nga ilang nakuha gikan sa kadalanan sa atong siyudad. Ang uban kanila gipasagdan lamang sa ilang mga ginikanan. Sila ang mga kabataan diin maoy unang nabiktima sa mga pagpang-abuso sa mga walay puangod nga ginikanan tungod sa pagka-bungkag sa pamuyo. Ang uban ginikanan naminyo sa pila ka higayon maoy resulta nga mapasagdan ang nauna nila nga kabataan.

Si Ms. Iluminda A. Domingo, facilitator sa GSK, mibutyag nga kini ang hinungdan nga sila nagpahigayon ug educational forum didto sa Consolacion National High School sa Barangay Consolacion matag Miyerkules sulod lamang sa bulan sa Oktubre. Hugot usab ang suporta ni Barangay Chairperson Cezar Pagapulaan ug uban pang opisyales sa barangay bahin niini nga patigayon sa paglaum nga mausab gayud ang dagan sa pamilya sa ilang lugar.

Ang nasangpit nga forum adunay upat ka hugna diin isa sa isyu mao ang pagtulun-an bahin sa pamilya kon unsa kini ka-importante sa mga kabataan. Dinhi gipasabot ngadto sa mga ginikanan kon unsa ang ilang angay buhaton aron nga dili mabungkag ang ilang pamuyo tungod ka yang unang maapektuhan mao ang kabataan. Lakip niini mao ang pagpasabot kanila bahin sa Republic Act 9231 kon Worst form of Child labor; R.A. 9262 kon Anti-Violence Against Women and Children Act (VAWC); R.A. 9208 kon Anti-Trafficking in Person Act; R.A. 8353, Anti-Rape Law ; R.A. 7610, Anti-Child Abuse Act; R.A. 9165, Dangerous Drugs Act ug ang R.A. 9775, Anti- Pornography Law.

Kini nga mga balaud, matud sa GSK, naghatag katungod dili lang kabataan apan usab ang ilang mga ginikanan aron pag-protiher kanila sa mga pang-abuso. Lakbitan usab sa maong panagtapok kon unsaon paglikay nga makaangkon sa Homeo Immuno-Deficiency Virus-Acquired Immuno-Deficiency Syndrome (HIV-Aids).

Gipanawagan usab sa GSK nga unta ang mga biktima niini nga sakit dali nga magpahibalo ngadto sa gitugyanan sa balaud.

Matud sa GSK ang mga kabataan adunay katungod nga moangkon ug kagawasan, makatagamtam ug matabangan nga mapalambo ang kinabuhi, makapartisipar sa mga kalihukan sa komunidad, maka tungha sa eskwelahan, ma-proteksyunan sa pagpang-abuso, manimuyo sa hapsay nga lugar ug katungod nga molahutay ug makaangkon sa tunhay nga kaharohay sa kinabuhi.

Sa pagsugod sa GSK kaniadtong 2004 mikabat na sa 40 ka kabataan nga ilang natabangan ug naamuma ubos sa ilang adbokasiya. Nasayran nga aduna silay padayon ug kasamtangang gi suportahan nga mga kabataan sama na lang sa 12 ka estudyante sa High School, 26 nga anaa sa elementarya ug duha ka graduating students sa koliheyo karong tuiga.

Si Ms. Domingo nanghinaut nga unta padayon pa ang suporta sa mga volunteer workers ug local government unit ngadto kanila.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph