Rody: Init ko sa illegal recruiter

GIBAHARAN ni Davao City Vice Mayor Rodrigo Duterte ang mga illegal recruiters nga di mopadayon sa ilang ilegal nga binuhatan dinhi sa siyudad.

"Init kaayo ko sa mga illegal recruiters," pahayag ni Duterte sa iyang programang Gikan sa Masa, Para sa Masa kagahapon.

Si Duterte nagbutyag nga sama kainit ang iyang kasuko sa mga illegal recruiters ngadto sa mga drug pushers nga mibiktima sa mga Dabawenyo.

Ang pahayag sa bise mayor miguwa dihang gipakisayran sa iyang co-host nga si Atty. Geraldine Tiu kon unsa ang iyang pahayag sa nahitabo sa 78 ka mga babaye nga nabiktima sa 5 Star Recruitment Agency niadtong Huwebes.

Ang maong ahensiya gironda sa mga sakop sa National Bureau of Investigation (NBI) Davao Region didto sa Loreto Street, Juna Subdivision, Barangay Matina Crossing, siyudad sa Davao.

Sa maong programa sa telebisyon, nakatilaw sab og sermon sa bise mayor ang mga tawo nga nagpabiktima sa mga illegal recruiters.

"Kamo eh, halos mangasaba ko ninyo, gahi mo og ulo, mora mo'g mamatay og dili mo makatrabaho," sulti ni Duterte.

Gipasabot sa bise mayor di maayong motuo dayon ang mga tawo kon makadungog nga dunay recruitment agency nga nangrekrut dinhi sa siyudad.

"Pangutana mo sa mga konsehal, sa akong opisina kon legal ba na nga agency," tambag sa bise mayor.

Sa laing bahin, gipaabot nalang ang adlaw nga taralon ang kasong large-scale and syndicated illegal recruitment batok sa tag-iya sa 5 Star Recruitment Ageny.

Gidemanda mao ang tag-iya nga si Reynaldo Madamba nga nakabase sa Quezon City ug manager nga si Raida Dauk kinsa nasikop niadtong Huwebes. (Alger P. Dura)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph