Roldan: 'Gaya-gaya, puto maya'

AMBOT kung nganong kanunay'ng makaani og pagsaway kining Department of Tourism (DOT). Gibalita sa nasudnong pamantalaan ug sa social network nga ni-trend kuno ang bag-ong slogan sa DoT nga "It's more fun in the Philippines." Ang trend maoy pulong nga gigamit sa social media sa internet nga nagpasabot nga daghan ang nilantaw sa imong website. Gawas pa nag-viral kini o kusog ang pagkuyanap sa site ngadto sa nagkalain-laing lugar sa kalibutan. Hastang lipaya sa taga DoT kay swak daw ang ilang slogan ug simple pa kaayo ang mensahe kay masabtan daw og madawat sa tanang tawo sa kalibutan ang pulong nga "fun". Daghan ang nakauyon apan mas daghan sab ang nibatikos kanila. Usa na niini mao si kanhi senador og DoT secretary Dick Gordon nga author sa Wow Philippines! nga slogan sa maong ahensiya kaniadto. Ingon pa niya nga walay originality sa maong slogan kay gikuha kini sa "It's more fun in Switzerland" niadtong 1951. Kung mahinumdoman nato, gibatikos pod sa katawhan si kanhi DoT Secretary Alberto Lim nga gipulihan ni P-Noy sa slogan niini nga "Pilipinas kay Ganda" nga gikopya sa tourism logo sa nasud Poland.

Gibatikos si Lim sa dako nga gasto sa gobyerno sa paghimo nga sa kaulahian nasutang "gaya-gaya, puto maya" ra man diay. Unta mapakong na kining taga DoT aron makamata og makahimo'g saktong slogan sa turismo sa nasud. Nahimo na sab ang Pilipinas nga kataw-anan kay sa kadaghan sa mga artists, manunulat, poet, ug literary experts sa nasud, mangopya pa gayud sa uban. Ang headlines sa pipila ka mga nasudnong pamantalaan sa niaging Dominggo nagpakita hinuon og mga hulagway nga dili "fun" ang kahimtang diri sa Pilipinas. Fun ba diay kanang mora'g Christmas tree ang pasaherong sakay sa mga jeep nga nagbiyahian sa kabukiran? Fun ba diay kanang halos 3-4 ka oras ang traffic jam sa Metro Manila ug sa baha inig mokusog ang ulan? Sayop tingali ang maong slogan aron ma-engganyo ang mga lokal ug langyaw nga mga turista sa pagbisita sa mga nindot nga lugar sa nasud. Unsa kaha kung maghimo og National Search for Slogan ang DoT kay mas lingaw pa? Naghimo gani og search ang Davao City sa paghatag og pangalan sa People's Park, ang DoT pa kaha ang di puwede?

Tabang gikan sa PinoyAb

Nagpadayon ang pagpadala og hinabang ang atong mga kapuso, kapamilya ug kapatid sa mga naigo sa Bagyong Sendong didto sa Cagayan de Oro ug Iligan. Ang Sun.Star Davao ug ABS-CBN nagsanib-puwersa aron makapangalap og hinabang para kanila. Ang atong mga kaigsuonang Overseas Filipino Workers (OFWs) ug mga Pinoy abroad (PinoyAb) nag-ambag usab aron makatabang. Usa na niini mao ang Worldwide Filipino Alliance-Pangdaigdigang Alyansa ng Pilipino, Inc. (WFA-PAPI) nagpadala usab og hinabang nga dul-an Ph45,000 pinaagi sa Philippine Red Cross sa katapusang semana sa Disyembre. Gikan kini sa mga PinoyAb sa Australia, KSA, USA, ug uban pa.

Manghinaut ang WFA-PAPI nga ma-engganyo usab ang ubang OFWs ug mga PinoyAb nga motabang ilabi na sa rehabilitation sa mga pamilyang naapektohan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph