Roldan: Nag-fortified rice na ba mo?

KARONG Nobyembre 7 saulugon sa nasud ang National Food Fortification Day. Subay kini sa Republic Act 8976 o ang Food Fortification Act of 2000 nga nagmando sa pagdugang og sambog sa atong mga batakang pagkaon aron makibhangan ang problema sa panglawas.

Kung wa ko masayop subay niining maong balaod mao ang pagdugang og Vitamin A, folic acid ug iron sa bugas humay, asukar, mantika ug harina. Tungod kini sa naglaganap nga problema sa malnutrisyon ilabina sa mga kabus nga bata ug nagmabdos nga inahan. Dugang usab kini sa ASIN Law niadtong 1995 diin gipabutangan og iodine ang asin aron mawagtang ang sakit nga goiter. Apan 12 na ka tuig nga milabay sukad napasar ang maong balaod ug hangtud karon, mora lang gihapon og umang ang implementasyon niini.

Tan-awa daw ang inyong mantika og harina kung na-fortify na? Basin anaa ra sa pakite sa ilang produkto ang Vitamin A, iron, iodine ug folic acid nga gimando sa balaod.

Sa pagka-tinuod, ang pag-fortify sa commercial rice gihapon ang pinakalisud buhaton tungod sa mentalidad nga mas lami ug masustansiya ang bugas nga puti ug sa pagbabag kuno sa pipila ka dagkong rice millers ug traders niini.

Way problema sa NFA rice kay ingon nila 100% na daw ang ilang fortification karong tuiga ilabi na sa paglusad sa I-Rice sa palengke. Bisan anaa na kining balaora, dili gihapon mapa-fortify sa gobyerno ang commercial rice nga naglangkob sa 70-80% sa bugas nga gikaon.

Busa ang resulta kay taas gihapon ang ihap sa mga tawo nga may Iron Deficiency Anemia (IDA), dili lang diri sa Davao kon dili sa halos tanang lugar sa Pilipinas.

Matud pa sa resulta sa DOST-FNRI’s 7th National Nutrition Survey niadtong 2008, duha matag 10 ka bata sa pre-school kay anemic. Usa sa matag 10 ka teenager anemic sab hasta ang upat sa matag 10 ka babaye nga mabdos ug tulo sa 10 ka inahan nga nagpasuso og bata.

Kung atong lantawon og maayo, taas gihapon kining maong ihap sa IDA nga unta puwedeng mapaubos kung sakto lang ang implementasyon sa maong balaod.

Ambot lang kung "It is fun in the Philippines" kung masakiton ug nagduka ang mga tawo ug mga bugok ang mga bata? Bisan kon daghan nang kuwarta nga niawas gikan sa 4Ps o Pantawid Pamilyang Pilipino Program ug sa "food for work program" kung dili gihapon masustansiya ang ilang gikaon, way kapaingnan kon dili ang mahal nga gasto sa pagpatambal sa ospital, medisina o ang sayo nga kamatayon.

Unta repasuhon pagbalik sa Kongreso kining maong balaod ug lantawon kung nganong dili mapa-implementar sa DOH ug sa NFA nga maoy lead agencies niini.

Naay tsismis nga basin kuno may mga interes nga maligsan kung ipadayon kining maong balaod busa hinay ang iyang aginod.

Tiaw mong minilyon ang magasto sa gobyerno sa pag-import og fortified rice o iron rice premix gikan sa US ug Vietnam nga isagol sa bugas.

Ipakita unta ni P-Noy nga lahi siya sa niaging mga pangulo sa pag-atiman sa kahimsog sa katawhan. Anemic sab kaha ang taga NFA ug DOH?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph