Romana girelibuhan; apan Mike di motuo sa Camp Crame

SA usa ka makakugang nga lakang taliwa sa hugot nga pagpangandam sa bagyong Ruby, ang Camp Crame nirelibo sa katungdanan kang Cebu City Police Director Sr. Supt. Noli Romana sugod niadtong Disyembre 4, 2014.

Si Romana nalakip sa pito ka mga opisyal sa Philippine National Police nnga nagagikan sa nagkadaiyang rehiyon sa nasud nga gipalagpot sa sa Camp Crame nga way rason.

Sa order kang Romana, siya ibutang ngadto sa Civil Security Group (CSG) sa Camp Crame.

Apan si Cebu City Mayor Michael Rama, kinsa maoy nangusog nga matudlo si Romana isip Cebu City police director, niingon nga magpabilin ang opisyal hangtod nga siya makadawat sa kopya sa mando sa Camp Crame.

Bisan si Police Regional Office (PRO) 7 Director Prudencio Bañas wa makadawat sa kopya.

Nagdumili usab si Bañas sa pagkomentaryo sa pagrelibo kang Romana.

“As far as I am concerned, he will stay because I have yet to receive an order,” matod ni Rama.

Ang mayor nagkanayon nga iyang atimanon ang maong isyu human sa paglabay sa bagyong Ruby sanglit okupado ang iyang oras.

“I will attend to that matter when our typhoon problem is over, I don’t want to mix it with our preparation,” dugang ni Rama.

Si Romana, gitawgan sa makadaghang higayon sa Sun.Star Superba­lita sa iyang cellphone apan wa motubag.

Tungod sa maong ka­lam­boan, ang deputy ni Ro­mana nga si Supt. Alit Virtucio maoy magsilbeng officer in charge (OIC) sa CCPO sugod kagahapong adlawa.

Apan daghang mga sakop sa CCPO ang nabahin sa maong relieve order sanglit naakto sab nga busy sila sa preparasyon sa bagyong Ruby ug sa ubang mga kalihukan, sama sa Pasko, Bag-ong Tuig ug Sinulog nga nagkinahangan og hugot nga seguridad.

Wa na mohatag og ko­mentaryo ang ubang opis­yal sa CCPO kabahin niini.

Ang order alang kang Romana nga gipitsahan niadtong Disyembre 4, 2014, gipirmahan ni Di­rector Jaime Hermo Mo­­rente, director for Per­­s­onnel and Records Ma­nage­ment sa Camp Crame.

Dunay mga kuwest­yon sa kapabilidad ni Romana ning uwahi nga mga buwan tungod sa sunodsunod nga mga tulis sa dakbayan.

Bisan tuod sa sunodsunod nga mga tulis, ang CCPO maayo og performance sa pakigbatok sa ginadiling drugas.

Minilyon ka pesos nga balor sa drugas ang nasakmit sa kapulisan.

Nagduda si Romana nga ang mga tulis gitumong aron mahuyang ang iyang liderato sa CCPO pinaagi sa pagpakauwaw sa kapulisan.

Naundang na hinuon ang mga tulis sa mga mo­ney remittance ug convenience store sa pagsulod sa Disyembre.

Kini human usab mohul­ga si Rama nga kuhaon ang binuwan nga allowance nga gihatag sa Cebu City ngadto sa kapulisan sa siyudad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph