Sa 2 ra ka karsada gitugot ang parking

WAY nisupak sa gihimong public hearing kalabot sa parking ordinance nga giduso sa konseho sa dakbayan sa Mandaue kagahapon sa hapon.

Ang ordinansa gipa­abot nga iduso alang sa ikaduhang pagbasa sa mosunod nga sesyon sa konseho.

Gipangamahanan ni Konsehal Elstone C. Dabon, chairman sa committee on transportation sa konseho, ang maong ordinansa nga nagdili sa pag-parking sa tanang klase sa pampubliko ug pribadong mga sakya­nan kilid sa mga national highway ug uban pang dagkong agianan sa dak­bayan.

Gitugutan ang one-lane parking sa duha ka mga karsada nga mao ang A. del Rosario St., ug S.B. Cabahug St.

Sa hearing, onse ka mga national highways ug pito ka city roads ang gihinganlan nga di mamahimong kaparkingan sa mga sakyanan 24 oras.

Kini naglakip sa Plaridel st., M.L. Quezon st., A.S. Fortuna st., U.N. Avenue., L.Jaena st., M.C. Briones st., J.P. Rizal st., M. Logarta st., Ouano Ave., F. Cabahug (Panagdait) ug A.C. Cortes avenue.

Ang mga local nga agianan sa dakbayan naglakip sa P. Burgos st., H. Cortes st., Avenceña st., Gomez st., C.D. Seno st., E.O. Perez st., ug Matawi drive.

Atol sa hearing, gibut­yag usab ang mga silot nga ipahamtang sa mga drayber nga masakpang nakahimo og kalapasan.

Ang mga drayber nga nakahimog kalapasan ma­mahimong makamulta gikan sa P500 hangtod P5, 000 ug pagkapriso gikan sa usa hangtod unom ka buwan.

Tun- an usab sa Traffic Enforcement Agency of Mandaue (TEAM) ang mga lugar diin himuon sa dakbayan nga pay-parking zones. (John Paul Pepito Sun.Star Superbalita)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph