Sakop sa fraternity gipauwanan og bala

KAWATAN nga sakop sa usa ka fraternity patay kay gipa-uwanan og bala kagahapon sa alas 2:00 sa kadlawon didto sa Kingswoods Subdivision, Sityo Lipata, Barangay Linao, lungsud sa Minglanilla.

Si Jundy Lasola, 28, minyo walay trabaho sakop sa usa ka fraternity namatay human nakaangkog samad pinusilan sa ulo, ingon man bukobuko.

Wala mailhi sa kapulisan ang gitumbok nga mga mamumuno nga nagsakay sa motorsiklo nga paspas nga nisibat human sa krimen.

Si Sr. Insp. Richard Gadingan, hepe sa Minglanilla Police Station, nga nahinabi sa dySS Super Radyo/Sun.Star Superbalita miingon nga usa ka badlungon ug notadong kawatan ang biktima.

Matod niini nga nakadawat silag tawag sa telepono sa pag-abot sa iyang mga sakop sa lugar diin nagbuy-ob na kini sa karsada nga may samad pinusilan samtang dunay tulo ka kabhang sa kalibre .45, og usa ka slug.

Usa ka Bing Santos, mipadayag nga nakabati siyag buto-buto sa armas kagahapon sa kadlawon ug usa ka motorsiklo ang nagdali sa pagsibat.

Sa pagsusi sa ilahang mga silingan na­suta nga nagbuy-ob na ang biktima, sam­tang ang mga police midala niini sa tam­balalan pero gideklarar nga dead-on-arrival.

Gituohan nila nga tungod sa daghang reklamo batok sa biktima sa pagpanglungkab daghang mga tawong nasilo niini hinungdan nga gipatay.

Gilambigit sab siya sa pagsuway pag­patay sa iyang ig-agaw nga si Roy Ca­­ñeda, pipila na katuig ang milabay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph