Sarhento gipatay sulod sa videokihan

KIDAPAWAN CITY -- Usa ka sarhento sa militar ang gipusil patay sulod sa videokihan alas 10:20 sa gabii niadtong Dominggo sa probinsiya sa Cotabato.

Ang sundalo giila nga si Sargeant Vergelio Alvarez, kinsa sakop sa 38th Infantry Battalion sa Philippine Army.

Sa taho ni Kabacan Chief of Police Superintendnt Leo Ajero ngadto kang North Cotabato Provincial Police Office Director Roque Alcantara, nasayran nga nagkaguliyang mga kostumer sud sa Bunso Videoke House didto sa Mapanaw Street, Barangay Poblacion, Kabacan, human nga dunay nahitabong pinusilay.

Sa diha nga niresponde ang mga pulis ug sakop sa 7th Infantry Battalion, nakaplagan nila si Alvarez nga naligo na sa kaugalingong dugo ug wa nay kinabuhi.

Dunay samad pinusilan ang biktima sa ulo nga bahin.

Dugang ni Ajero nga duna matud pay nakalalis nga sundalo nga laing kostumer sa pikas lamesa nga maoy gitumbok nga mipusil kaniya gamit ang kalibre .45 nga pistola.

Sumala sa nakasaksi nga nag-ilog matud pa ang sundalo ug ang laing kostumer sa usa ka Guest Relation Officer hinungdan sa pagpamusil.

Apan di pa maklaro sa mga otoridad ang bansagon sa suspetsado gumikan kay padayon ang ilang imbestigasyon.

Gimandoan na ni Alcantara si Ajero nga tutukan ang maong hitabo aron nga ilhon ug dakpon ang mamumuno sa sundalo. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph