Sekyu nagpinusilay; 1 patay

DEAD on the spot ang usa ka sekyu human nagpinusilay sa laing sekyu niadtong Lunes mga alas 11:45 sa gabii sa Fil-Estate Premises, Gusa ning siyudad sa Cagayan de Oro.

Dead on the spot si Rene Pelingon, hingkod ang edad, sakop sa Lonestar Security Agency ug nagbantay sa Sacred Heart Montessori sa Jr. Borja Extension ning siyudad duol lamang sa lugar nga nahitaboan.

Ang kapolisan sa Police Station 3 (PS3) sa Agora niingon atol sa pakighinabi sa Sun.Star Superbalita nga sa wala pa nahitabo ang insidente gipa-blotter sa presintuhan si Pelingon tungod kay nagmaoy kini sa kahubog.

Giingong nagpabuto kini sa iyang isyu nga kalibre .38 ug rason niini nga warning shot lang ang iyang gihimo.

Pag-abot sa alas 11:45 sa gabii padayon sa iyang pagpagawas gawas sa iyang armas si Pelingon ug nanghagit ngadto usab sa usa ka sekyu nga mao si Alexander Mercado, 41, minyo, taga Lantod, lungsod sa Talakag Bukidnon, security head sa Valiant Group Security Services inc.

Si Mercado nga nainterbyu sa Sun.Star Superbalita niingon nga una unta siya nga pusilon niini bisan paman pipila na ka higayon niya nga gibadlong si Pelingon apan lage kay hubog maghapa-hapa usab ug aksyon nga makigpinusilay ngadto kaniya.

"Gipusil nako siya pero dili tumong aron patyon aron lang unta warningan sab para mohunong pero wala ko kabalo nahapla na diay siya kay naigo sa iyang dughan," saysay ni Mercado ug nipasabot nga self defense ang iyang gihimo tungod kay siya ang punto niining pusilon niadtong gabhiona.

Gani dili siya makatuo nga mahitabo ang insidente tungod kay bisan dili sila kauban sa ahensya higala niya kini kay taod-taod na usab kini nakabantay sa maong dapit.

Boluntaryong mitahan sa PS3 si Mercado ug kasamtangan nagtingkagol sa prisuhan.

Gi-turn over usab niini ang iyang 9mm pistol nga maoy nakapusil patay sa biktima nga aduna pay lima ka buhing bala.

Nasuta sa kapolisan sa PS3 nga naigo sa iyang dughan si Pelingon nga milahos pa sa likod nga bahin niini diin ning panahona gidala na sa Bollozos funeral parlor.

Dugang imbestigasyon gihimo na sa kapolisan ning panahona ingon man pagpasaka og kaso batok kang Mercado. (Stephanie V. Berganio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph