Serna: Folding bike (1)

Roger Serna

Pedal

SUKAD naghisgot ko og folding bikes, duna nay mga nangutanang reader pinaagi sa akong Facebook account kon asa makapalit og folding bike nga maayo ug unsa nga brand.

Kini nga mga pangutana komplikado og tubag kay kada tawo lainlain og ganahan ug katuyoan sa pagsakay og biseklita. Dunay uban lingawlingaw lang, suroysuroy sa karsada. Naay uban para exercise samtang ang uban, gigamit nga transportasyon sa mga lakaw ug trabaho. Naay mga biyahe nga lagyo ug naa say duol.

Magdepende sab ni sa lugar nga imong gipuy-an ug suroyan.

Brands

Naghisgot na ko dinhi og brand names sa mga folding bike, labina sa kadtong naa nako.

Kon naa man ko niana, wa na magpasabot nga ang ubang mga brand di maayo. Sa ako nang giingon nga depende ra na sa taste nimo.

Kini man gung folding bikes nga surplus gikan sa Japan. Busa, bisan gibuhat sa China, ang iyang kalidad gibase sa standard sa Japan, busa lig-on kaayo. Mao nang bisan ang imong folding bike dunay brand nga Topone, My Pallas, Captain Stag, Lecciti, Caro, Sunflower, Hummer ug Corvette, maayo gihapon na.

Design

Ako lang ning ibase sa akoang kasinatian. Gawas sa brand, ang akoang tan-awon mao ang desinyo sa biseklita. Ganahan gani ko sa design, ako ning bitaron. Sagad akong pilion kanang di kaayo komon og design. Apan wa ni magpasabot nga dunay bati, dunay nindot. Alang nako, ang design is a work of art. Depende ra na sa nagtan-aw.

So far, daghan ang ganahan sa mga design nga akong napilian. Actually, nindot siya tan-awon kay gawas nga maayong pagkalimpyo sa shop nga akong gipalitan sa bike, grabe sab ko moatiman ug molimpyo. Mao nang bisan di kaayo gwapo, nindot siyang tan-awon kay sinaw, way abog ug uban pa. Maglimpyo ko sa bike makausa sa usa ka semana, gigamit man o wa.

Geometry

Bisan sa pagpili og mountain bike, usa ni sa mga importanteng imong ikonsiderar sa pagpalit og biseklita. Nahaom ba ang frame ug ubang dimension sa biseklita sa imong gidak-on.

Sa ubang bikes sama sa MTB, ang size sa frame mohaom gyud sab sa imong gitas-on. Alang nako, sa pagpili og folding bike, importante sab kaayo ni. Mao nang one time, dihang niduaw ko sa bike shop ni Jay Garganera, akong gisakyan ang bike.

Duha ka mga folding nga akong giganahan ang design ug brand ang diha. Makalibog kon bag-o ka pa lang mag bike kay pulos gyud nindot.

Ang akong gibasehan sa pagpili sa duha mao ang iyang geometry nga moapekto sa akong legwork. Pinaagi niini, akong napilian ang usa ug maoy akong gipalit. Gikinahanglan nga dunay igong gilay-on ang imong mga tuhod sa manubela aron di ka magtikuko og maayo samtang magsikad. Okay lang na kon dug-ol. Apan kon mobiyahe ka og labing minos 10 kilometros sama nako, mas maayo ang medyo taas nga frame.

Sa sunod, hisgutan nako ang uban pang ikonsiderar sa pagpalit og folding bikes.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph