Simbahan nakauyon sa 'Queen of May: Santacruzan sa Davao 2011'

MAPASALAMATON ang lokal nga gobyerno ning siyudad sa positibo nga komento sa Simbahang Katoliko kalabot sa unang "Queen of May: Santacruzan sa Dabaw 2011," ning siyudad nga gihimo niadtong Sabado, subay sa nag-unang kadalanan sa downtown area.

Ni Oca Casaysay nga subay sa pahayag gikan sa simbahan, naka-uyon sila sa kalihukan tungod wala kini milapas sa naunang kasabutan nga isubay kini sa tradisyunal nga pamaagi.

"Mayor Inday (Duterte) is glad, as well the Church kasi nga nagustuhan nila ‘yung presentation last Saturday. As we've promised, it will follow the traditional way in which we asked talaga the help ng Church people on this," ni Casaysay atol sa Kapehan sa Dabaw, Lunes.

Sumala pa nga usa sa gikasabutan mao nga siguraduhong di kaayo seksi ang isuot nga sinina o gowns sa mga partisipante, di mahimo nga daw usa ka fashion show ang aktibidad.

"Mao na ang unang concern sa simbahan nga basin mahimo nga usa ka fashion show ang Santacruzan. Pero misaad mi nila nga dili gyud. Mao nga ang mga reyna nato, mao gyud tong naa sa among gihimo nga research, ang gisuot nilang gowns dapat dili kaayo makita ang dughan, ang slit dapat 2 inches lang above the knee," pasabot sa opisyal.

Sa nakalabay nga Mayo 21, nalingaw nga nagsud-ong ang Dabawenyo, mga bisita lokal man o langyaw sa unang Santacruzan nga kabahin sa unang Davao Summerfest.

Gihulagway nga usa ka “street pageantry” ang aktibidad isip pahinungod kang Birheng Maria, pinaagi sa tradisyunal nga prusisyon, pagpakita sa Santacruzan nga kabahin sa kultura sa Pinoy, apan sa hinay-hinay nawala na tungod sa nagka-advance nga panahon.

"It was the idea of Mayor Inday to revive it kasi sabi niya last niyang nakita ‘yung Santacruzan in a traditional way is 1980's pa.”

Ang "Queen of May: Santacruzan sa Dabaw 2011" dunay tulo ka kompetisyon, kini ang Traje delas Reinas (Gown Competition) nga may 27 ka designers nga misalmot, Arcos Iluminados (lighted Arcs Competition) nga may 27 sab ka mga partsipante ug ang Reyna Sagala (Queen of the Procession) nga may 27 ka mga sumasalmot.

Ang kompetisyon nahimong dalan alang sa mga Dabawenyo designer dinhi nga mapakita ang ilang abilidad sa pag-desinyo og gowns, arko, ug uban pa.

Tungod sa kalampusan nga naangkon sa aktibidad, gibutyag ni Casaysay ang mas maanindot pa nga sama niini nga kalihukan sa mosunod nga tuig nga gilaumang kuninitan sa mga langyaw ug lokal nga turista. (Rhona O. Goc-ong)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph