GIDEPENSAAN ni 7-footer Greg Slaughter ang iyang desisyon sa pag-withdraw sa Gilas Pilipinas national training pool human siya nakadawat og negatibong mga feedback gikan sa ubang local basketball fans.
Giklaro sa sentro sa Brgy. Ginebra Gin Kings nga personal niyang desisyon ang pagbalibad sa kahigayunan nga makaduwa alang sa national team sukwahi sa katahap nga gi-pressure lang siya sa San Miguel Corp.
“While I have received a lot of supportive feedback, I am saddened to see how hateful some of my fellow countrymen have reacted to my decision while continuously expressing their hate even as going as far as continuously expressing their hate online directly towards me or indirectly,” mensahe ni Slaughter sa iyang Twitter account.
Ang kasamtangang no.1 rookie pick sa Philippine Basketball Association (PBA) nagtuo nga mas angayang morepresentar sa Pilipinas alang sa umaabot nga FIBA World Championship sa Spain ang mga magduduwa nga nakalangkat og silver medal sa FIBA Asia Championship. Ang top three sa FIBA Asia mao ang naka-qualify alang sa FIBA World.
Mao sab kini ang nakitang rason ni Marcio Lassiter sa San Miguel Beermen hinungdan nga nakadesisyon sab kining moatras sa imbitasyon nga moapil siya sa national training pool.
Ang mga magduduwa nga naka-silver sa FIBA Asia mao sila si Jimmy Alapag, LA Tenorio, Jeffrei Chan, Jayson Castro, Gary David, Ranidel de Ocampo, Gabe Norwood, Larry Fonacier, June Mar Fajardo, Japeth Aguilar, Marc Pingris, ug naturalized citizen Marcus Douthit.
“For all the bashers: please remember Marcio and I have proudly served the national team for four years straight. I even did everything I could in practice to help Gilas prepare for the World championship qualifier last August,” pasabot ni Slaughter, produkto sa University of the Visayas (UV) Green Lancers dinhi sa Sugbo.
“I see no one more deserving than the 12 to go to Spain and play in this possible once-in-a-lifetime opportunity.”
Adunay mga nagtahap nga ang San Miguel management mao ang nagmando nila ni Slaughter ug Lassiter nga moatras sa Gilas kay gipadagan kini sa sportsman Manny V. Pangilinan, karibal sa San Miguel sa pamatigayon.
Sila si Slaughter ug Lassiter parehong sakop sa teams nga lakip sa mga gipanag-iya sa San Miguel Corporation nga naa sa PBA. (ESL)