ANG Garbo Asenso Sumbanan Alyansa (Gasa) ug Prevention Restoration Order Beautification Enhancement (PROBE) mosakmit sa mga tinda nga ibilin sa mga regulated vendors sa mga aseras panahon sa kagabhion sa dakbayan sa Sugbo.
Matod pa ni Raquel Bohol-Arce, pangulo sa Probe, nga adunay board resolution ang Gasa nga kinahanglan nga luwas ang sidewalk gikan sa mga butang nga makababag sa agianan sa tawo gikan sa alas 10 sa gabii hangtod alas 6 sa buntag.
Makapadayon sila pagtinda gikan sa alas 6:01 sa buntag hangtod alas 9:59 sa gabii.
Sulod sa dugay nga panahon, ang gatusan ka mga vendors kinsa naninda daplin sa karsada sama pananglit sa dalan Colon, Osmeña boulevard, Leon Kilat, Manalili, Magallanes ug uban pa nga dagsaanan sa mga tawo, magbutang sagad sa ilang mga lamesa ug kurmata nga adunay tinda ug ibilin sa lugar.
Ila lang kining puston og trapal nga maoy hinungdan nga makaali sa agianan.
Matod pa ni Arce nga nagsugod na sila karon pagpatuman sa maong polisiya sa Gasa kinsa maoy nag-regulate sa mga sidewalk vendors nga sagad kanila sakop sa Cebu City United Vendors Association (CCUVA), hilabi na sa Leon Kilat, Manalili ug Magallanes.
“Ang atong operativces mo-roving na sila 10pm to 6am aron mo-clear sa area. Kon naay ipangbilin ato gyud nang i-confiscate,” pasabot ni Arce.
Ang madakpan mopaubos og seminar sa primirong higayon, molukat og P500 sa ikaduha ug di na tugotang makatinda kon masubli pa ang ilang kalapasan, ni Arce pa.
Giawhag usab niya ang ubang mga dapit sa siyudad nga wa pa malakip sa ilang operasyon sa pagsunod sa kamanduan sa Gasa aron di na sila mapurihisyo sanglit di sila magpanagana pag-embargo sa mga tinda nga gibilin.
Dugang sa hepe sa Probe nga aduna silay gisunod nga direksyon ug sa umaabot nga panahon, malimpyo na ang sidewalk.
Samtang gitangtang ug gikuha sa Probe ang mga pisi ug baril nga gikuralkural sa usa ka condo-hotel sa dalan Ranudo subay sa board resolution sa Citom sanglit makabalda sa mga motorista.
Way bisan usa ang nibabag sa operasyon sa Probe human sila nihatag og 72-hour notice ngadto sa responsabli pagbutang sa mga pisi ug baril.PAC
