SAMTANG nangandam ang Sun.Star Davao Superbalita sa ika-15 nga anibersaryo ug gilusad sa Star Davao ang hastag #experience Sun.Star, gisugdan na sa kompanya ang paglusad sa Photo Safari pinagi sa pagbisita sa mga suking tigbasa sa nagkadaiyang lugar dinhi sa rehiyon.
Unang gibisita ang 16th Founding Anniversary sa Island Garden City of Samal niadtong Biyernes, Marso 7.
Sa maong lugar naghulat ang mga suki sa Superbalita aron makadawat sa libreng t-shirt ug kalo ug makuhaan og hulagway.
Ang pagpanghatag pahalipay gihimo sa kompanya sa mantalaan nga nagaalagad sa tibuok pamilya ug katilingban.
Dihang miabot ang team sa PeƱaplata diin gilusad ang aktibidad sa anibersaryo sa Igacos, gisugat kami sa mga suki nga nagdala og masthead isip pamatuod nga nagbasa sila sa Superbalita.
Ang Superbalita maoy usa sa mga sponsors sa 16th Founding Anniversary sa Igacos.
Pagkaugma, Sabado, gibisita sab sa Sun.Star Team ang Compostela Valley Provincial Capitol sa Nabunturan diin gisaulog ang 16th Founding Anniversary ug 7th Bulawan Festival.
Unang gihatagan og t-shirt ug kalo si Governor Arturo Uy atol sa gihimong courtesy call sa team sa governor's office.
Ang Sun.Star mitunol og libreng t-shirts sa tanang midaug sa art competition nga gilusad sa Provincial Tourism Office.
Malipayon kaayo ang katawhan, uban sa mga empleyado sa kapitolyo, lakip ang mga bisitang sundalo nag-ilogay sa t-shirts ug kalo.
Ang kainit sa adlaw baliwala lamang sa Sun.Star Team sanglit di ikahulagway ang kalipay nga gibati sa mga suki nga tigbasa.