Sto. Niño misayaw

GISANGYAW karon sa kanhi barangay kagawad ang kahibulongan nga hitabo sa iyang kinabuhi dihang misayaw sa iyang mga palad ang rebolto ni Sr. Sto. Niño samtang nag-ampo siya niadtong Pebrero 15.

"Nag-ampo ko last February 15. Samtang akong gibutang sa akong mga palad si Sr. Sto. Niño, nakurat ko kay milihuk ang rebolto," pahayag ni Edwin Castro sa Sun.Star Superbalita kagahapon sa buntag.

Si Castro, nagpuyo sa Fatima, Barangay 24-C Poblacion, mibisita sa buhatan sa Superbalita aron ipahibawo ang kahibulongan nga hitabo.

Siya nagbutyag nga sa unang higayon nga milihok ang rebolto ibabaw sa iyang mga kamot, daw dili siya makatuo nga tinuod ang nahitabo.

"Sa akong pagkatulog, gipadamggo ko nga akong isangyaw sa katawhan nga nagmilagro si Sr. Sto. Niño dinhi sa Dabaw," pahayag ni Castro.

Buot pamatud-an ni Castro nga tinuod nga molihok ang rebolto ibabaw sa iyang mga kamot mao nga nangita siya og rebolto sa buhatan sa Superbalita.

Sanglit way rebolto ang buhatan, siya nag-imbita sa mga personahe nga mobisita sa iyang balay aron didto iyang ipakita ang kamatuoran.

"Tungod kay di man ko motuo sa unang pipila ka adlaw, akong gisulayan ang rebolto sa among mga silingan, ug didto ilang nakita nga tinuod ang akong gisulti," dugang asoy ni Castro.

Suma niya nga makapamatuod niini ang pamilyang Bautista, Salarda ug Cepadan sa ilang lugar.

Dihang gisusi sa Superbalita ang ilang lugar, usa ka retiradong magtutudlo nga si Blandina Butalid nagsulti nga iyang nakita nga milihok ang rebolto ni Sr. Sto. Niño.

"Sa akong nakita, mas milawom ang akong pagtuo kang Sto. Niño isip usa ka deboto," pahayag ni Butalid.

Nasaksihan sab sa Superbalita ang paglihok sa rebolto ibabaw sa palad ni Castro.

Gipugngan pa sa tigbalita ang iyang mga kulamoy sa tuldo aron masigurong way pwersa nga makapalihok sa rebolto.

"Di man dayon ko motuo sa mga milagro, pero kinahanglan nga atong ipaagi sa proseso, ikonsulta sa pari," pahayag ni Adriano Pangan, nag-alagad sa Fatima Parish.

"Hinuon, akong nakita nga molihok ang rebolto nga iyang gigunitan dinhi sa Fatima Parish," dugang niya.

Alang kang Castro, daghan ang nagsulti kaniya og di maayo apan buot lamang niyang isangyaw ang maayong balita sa mga tawo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph