Sugilanon: Kasingkasing ni Melba

Carmelo D. Lariosa

Panadtaran, San Fernando, Cebu

DUGAY na si Caridad nga nakabantay sa kinaiya ni Melba nga dali ra kaayong makahilak.

Dili hinuon kini sama sa uban nga maghingos-hingos dayon kon mohilak. Lahi si Melba kay igo lang motubod ang iyang mga luha. Pero dunay expresyon sa panagway niya nga subo samtang magpadayon pagtulo ang iyang mga luha. Bisan ang iyang bana nga si Teofilo nakamatikod usab niini nga igo lang ipatulo ni Melba ang iyang mga luha kon duna kiniy kagul-an o gikasubo diha sa iyang dughan.

Karong adlawa mao ang ika-desisayes nga tingpamulak sa dalaga ug dunay salusalo nga himuon karong gabii. Giimbitar ni Melba ang iyang suod nga mga higala sa eskuylahan. Usa si Isagani, ambungang ulitawo nga nakagusto kang Melba sa hilom.

Alegre ang birthday party ni Melba kay gisayaw siya sa mga ulitawo nga kaila sa iyang Mama Caridad. Samtang nagpadayon ang kalingawan miduol si Teofilo kang Caridad.

u201cCaring, panahon nga sultihan nato si Melba sa kamatuoran nga dili siya nato tinuod nga anak ug nga sila ra si Dindo ug Josieta ang atong anak.”

u201cHa? Maayo kaha nang imong hukom, Teofy?” gibati og kabalisa si Caridad.

Miduol sila si Dindo ug Josieta nga wala pod mahibawo sa tinuod nga panghitabo sa kinabuhi ni Melba. Nahibaw-an nila nga ang ilang ginikanan gusto og ikatulong anak, apan si Caridad dili na manganak tungod sa diperensya sa iyang matris sumala sa espisyalista nga doktor.

Unya, usa ka sayong gabii may nabating uha si Caridad ug si Teofilo. Uha sa bag-ong natawong bata. Ilang gisusi ug didto ang masuso nga giputos sa lampin duol sa punoan sa kaymito luyo sa kusina sa ilang balay. Ug mao kadto ang nahitabo ug giisip nila nga tinuod nilang anak si Melba. Ug karon mao na ang higayon nga ilang ibutyag ang dugay nang tinaguan sa kinabuhi ni Melba.

u201cMao ba diay, Mama, Papa, dili diay ko tinuod ninyong anak? Okey ra uy. Ang importante nga inyo kong gipadako ug gihatagan og hustong pag-amuma ug pagmahal. Sa akong kasingkasing kamo gyud ang akong mga ginikanan!” Ug misugod paglugmaw ang mga luha ni Melba. Miduol siya kang Caridad ug migakos.

DUHA ka tuig ang milabay ug nahibulong sila si Caridad ug Teofilo kay nagmaluyahon na si Melba. Gidala nila sa doktor ug nahibaw-an nga may kanser sa dugo ang dalaga. Kay nahigugma man si Isagani kang Melba gipakaslan niya ang dalaga bisan nasayod sa sakit niini. Human sa ilang kasal nakuyapan si Melba. Nabalaka si Isagani kay nianang bulana ang tagal sa kinabuhi ni Melba.

Dihang namatay si Melba dinhay pahiyom nga mibathay sa iyang mga ngabil. Unya miduol si Dindo Caridad ug gitunol ang sulat-panamilit ni Melba. Gibasa ni Caridad, “Papa Teofy, Mama Caridad, salamat sa inyong pagpadako nako. Di gyud nako kamo hikalimtan kon tua na ako sa langit!” (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph