Sugilanon: Mikunsad ang kamatuoran

Estrella Dolores

Sambag 2, Cebu City

DINHI sa Tubod National High School, siya ra ang magtutudlo nga lalake. Ang lima pulos mga babaye. Ang tulo mga minyo na, samtang ang duha mga dalaga.

“Mona, Monching, si Karla lahi nga pagka babaye. Kini ang akong napanid-an.” Misulti kaniya si Laura samtang nag-angkas sa iyang motorbike dulhog sa lungsod.

“Bitaw daginuton kaayog pahiyom, apan buotan kay wa ko kadungog nga nanguyab siya. Mora bag naglikay sa mga lalake.” Tubag niya.

“Di ganahan nga magsuroy-suroy gani sa mga pista sa Tubod di mokuyog nato nga unta imbitado man ta. Ang leksiyon ra gyud ang anaa sa iyang pangisip.” Mipuno si Laura.

Gipadagag kusog ni Ramon ang iyang motorbike. Mipiit og gakos si Laura. Nasingo niya ang gininhawa sa dalaga. Unya, nabati niya nga napaod sa iyang buko-buko ang dughan ni Laura. Apan wa mogimok ang iyang pagka lalake kay igsuon ra ang iyang pagtagad sa babaye.

Naapsan nila ang gisakyan ni Karla nga pedicab. Miwara-wara sa kamot si Laura ngadto kang Karla. Miyango si Karla samtang migisi ang tim-os nga pahiyom sa iyang mga ngabil. Nakita kini ni Monching. Mikilo siya kang Karla,. nga kusog milabay sa gisakyan sa dalaga.

“Uy, Monching amoa na, mora ka mag gidagaw.” Gipahunong ni Monching ang iyang motorbike. “Sorry, Law, nasaylo kag gamay. Nakalimot ko da.” Unsaon, nalamat man siya sa katamis sa pahiyom ni Karla. Nanaog si Laura nga nagpahiyom. Misirit ang bike ni Ramon lahos sa iyang gipuy-an.

Pagkaugma, naagian ni Ramon nga nag-atang pa si Karla sa may eskina. Gipahunong niya ang motorbike ug giagda ang dalaga sa pag-angkas. Nakita niya nga nagpanuko kini. Morag miungot ang mga tiil.

“Angkas lang gud, Karl, wa may mawa nimo, hala, ma-late ka.” Gihadlok niya ang maestra nga sa iyang nahibaw-an wa pa sukad ma-late. Milakang kini ug miangkas niya.

“Gaksa ang akong hawak, Karl, ngalig mahug ka. “Mipahimangno siya. Human makagakos sa iyang hawak, gipasirit niya ang motorbike. Napaminawan niya nga gipalayo sa dalaga ang iyang lawas. Bisan ingon niini ang gihimo sa dalaga, gibati niya ang kalipay kay sa katapusan miangkas na gyud niya ang babaye nga iyang gikaibgan.

Wa niya kapugngi samtang nagdagan sila mihangyo siya kang Karla nga mamisita sa iyang gipuy-an. Wa siya magdahom nga misugot si Karla.

“Aw, iatol karong Dominggo, Monching, kay duna koy andam.” Migisi na sad ang tam-is niining pahiyom nga nakapasamot sa iyang kaanyag. Bahala na, padaygan na niya sa iyang gugma si Karla inigpamisita niya sa Dominggo.

Miabot ang adlaw sa iyang pagpamisita. Nahibung siya nganong daghan ang mga tawo sa tugkaran sa boarding house ni Karla. Misamot ang iyang kahibung dihang nakita niya ang kauban niyang mga magtutudlo. Gikamay siya ni Laura.

“Monching, naa si Karla sa itaas. Nag-ilis na. Madre man diay na siya ug nahuman na ang iyang mission, bantog ra.. Nia ang iyang mother superior karon, atong siyang ihatod sa kombento sa siyudad.” Namulong si Laura.

Wa siya makatingog. Karon na siya nahibawo nganong naglikay siya sa mga lalake. Usa diay siya ka madre nga nag-mission sa bukirang eskuylahan sa San Fernando. Misakay siya pagbalik sa iyang motorbike nga mibagudlos ngadto sa mamingawng unahan. Si Laura nahiugbok sa iyang gibarugan. (Katapusan)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph