Sugilanon: Sa laing kinabuhi

Lamberto G. Ceballos

Cawayan, Dalaguete, Cebu

Si Yeba ug si Jodam

MIGAWAS si Yeba sa langob nga iyang gipuy-an uban ni Nana, iyang inahan. Ngamig nga hangin misugat kaniya ning gabhiona. Nagsul-ob siyag sapot nga ginama gikan sa mga panit sa ihalas nga mga hayop nga gisumpay-sumpay. Mihaom kini sa ibabaw niyang lawas ug mitabon sa bus-ok niyang dughan nga mao pay pagtungtong sa ika-18 nga pagsubol.

Gilingi niya ang sulod sa langob. ‘Natulog na si Nana,’ ni Yeba. ‘Molakaw na ko.

Nagpaabot na karon si Jodam kanako sa among abutanan.’

Nakita niya si Jodam nga naglingkod sa lapad nga bato ilawom sa dakong kahoy nga Aysaka sa tampi sa kimba nga nag-umbaw sa walog sa ubos nga patag.

“Jodam, mahal ko, kaganina da ikaw?” sukna ni Yeba nga midip-ig sa abaga ni Jodam.

“Taudtaod na. Nganong nalangay ka, mahal?” ni Jodam nga miagbay sa dalaga.

“Gihulat ko nga mahikatulog si Nana.”

“Basig mao na ni ang kataposan natong panagkita, Yeba. Kaslon ka na kang Yagnos inigtakdol sa bulan,” namulong si Jodam. “Siya ang gipili ni Nana nga imong mahimong kapikas.”

Ikaw ang matuod kong gihigugma, Jodam.” Migakos si Yeba sa ulitawo.

“Sa inyo unyang kasal ni Yagnos, mobiya ko dinhi. Apan paabuton ko ikaw, mahal, sa laing kinabuhi,” May luha nga nabiaw sa mga mata ni Jodam.

“Pangitaon ko ikaw didto, Jodam,” ni Yeba nga naghilak.

TAKDOL ang buwan. Sa hawanan sa langob ni Nana ug Yeba nagkapundok ang mga sakop sa ilang tribu nga misaksi sa kaminyuon nilang Yeba ug Yagnos.

Nakita kining tanan ni Jodam nga nagpaantaw lamang didto sa kilid sa iyang langob.

Unya mitalikod siya, dala ang iyang bangkaw. Maoy iyang gidulong ang abutanan nilang Yeba. Pag-abot niya didto misinggit siya sa kinatibuk-an niyang tingog, “Yeba, paabuton ko ikaw sa laing kinabuhi!” Ug miambak siya sa kimba. Pagka buntag nakaplagan ang patayng lawas ni Jodam sa iyang mga ka-tribu. Didto sa ilang langob gipaagay ni Yeba ang daghang mga luha.

******

Si Evelyn ug si Adamson

PASADO alas singko na sa hapon. Nahuman nag panghapnig si  Evelyn sa mga ledger ug journal sa iyang lamesa. Usa siya ka accountant sa Sollabec Accounting Services. Giayo niya ang blazernga asul nga gisapaw sa iyang blawos nga rosa ug gihinlit ang asul sab nga sayal. Migawas siya sa opisina ug mipaingon sa elebetor.

Nakita niya nga usa ray pasahero gikan sa itaas nga mga andana. Usa ka lalake nga nagsul-ob og T-shirt nga may stripe berde ug puti; ang karsones niini maong. Misakay siya ug gitulpok ang buton nga “G” para ground floor. Gipasiklapan niya ang lalake.

Kalit subsob nga mikubakuba ang iyang dughan. Guwapo kini ug kalit nga misantop sa iyang alimpatakan ang ngalang ‘Jodam.’Sa laing bahin, ang lalake mitutok kang Evelyn. “Yeba,” nabati ni Evelyn ang hagawhaw sa lalake. Miuliot sa iyang pandungog ang ngalan nga gihagawhaw sa lalake.  

“Hi! I’m Adamson. May I know you?” matod sa lalake. “Just call me Adam.”

“I’m Evelyn.  Eve for short. Are you working in this building?” ni Evelyn. Wa siya batiag kabakikaw sa daw presko nga pakig-ila-ila kaniya sa lalake.

“Yeah. Architect ko ug naa magtrabaho sa Sugbo Builders Corp. sa 6th floor,” tug-an sa lalake.

Dihay nanakay sa elebetor sa fourth, third ug second floor. Pag-abot sa ground floor uwahi nga nanaog si Evelyn ug si Adamson.

Mitan-aw si Adamson kang Evelyn. “May I invite you to a cup of coffee, Eve?”

Mitutok si Evelyn sa lalake ug mipahiyom. “Sure. Why not?” Sa pambatyag niya, morag daan na silang kaila ni Adamson. Mao nga gaan ang iyang buot ngadto niini. Gigunitan ni Adamson ang usa ka bukton ni Evelyn nga wala motukol sa gibuhat sa lalake. Ug nanulod sila sa Universe Coffee Shoppe.  Ug nagsugod ang panagsuod nilang Eve­lyn ug Adamson. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph