Sugilanon: Sa lapyahan sa gugma

Bartolome Man. Panilago

Lacaron, San Fernando, Cebu

HAGKOT na ang kabugnaw sa hangin sa kahapunon. Ingon sa gipanutho gikan sa kalawran nga misapigad sa kalawasan ni Sister Lipaser. Tangkod nang upat ka tuig sukad siya nahibalik ning dapita sa baybayon diin kaniadto anhi sila magtagbo si Bartolo.

“If I were you, Sister Lisaper, mo-file kog leave of absence aron makaduaw ka sa masakiton nimong inahan,” tambag kaniya ni Sor Theresa, ilang Mother Superior.

Nakadawat man siya og text message gikan sa usa ka higalang babaye nga kaslon na si

Bartolo sa umaabot nga Sabado sa ilang lungsod sa San Fernando. Sukad siya mopuyo sa kombento sa mga madre sa Mabolo panagsa na lang siya mahiuli sa ilang balangay sa San Isidro. Gibakakan niya si Sor Theresa nga ang iyang inahan masakiton, apan ang tinuod, tambungan gyud niya ang kasal sa iya kanhing hinigugma.

Nahinumdom siya sa mga pulong ni Bartolo kaniya nga hupong sa kaanindot ug daw kinamayan nga nagkanayon, “Dinhi ning lapyahan sa San Fernando, Lisaper, kuliton ko ang buhing titik sa kadalisay sa akong gugma kanimo ug way gamhanang kamot sa kinaiyahan ang makapapas niini aron hilison sa kawalaan.” Wa kapugngi ni Sister Lisaper ang pagpanglugmaw sa iyang mga luha. Iya kining gisawilik ug kini nahisagol sa asgad nga dagat, nga inanay nang miayaay ngadto sa paghunas.

Subsob ang iyang pagbakho. Gilantaw niya ang dagat. Gihagawhaw ang ngalan ni Bartolo nga karong hapuna hiusahon na sa talikala sa kaminyuon uban sa laing babaye. Samtang siya nagsubay sa baybayon, ingon sa misakit ang iyang dughan nga nakasigpat niadtong dapit diin kulita ni Bartolo ang mga titik nga hupong sa gugmahanong pulong. Karon gipapas na sa way puangod nga mga balod.

Daw inihap ang iyang linaktan padulong sa gate sa simbahan. Didto sa sulod mao pa gyud ang pagpahigayon ni Padre Gaspar sa se­remonyas sa pagkasal nila ni Bartolo ug sa nobya niini. Sa iyang gilingkoran way timik si Sister Li­saper nga mitutok sa duha ka binuhat nga naglingkod atubangan sa altar. Mitibi ang iyang mga ngabil ug hilom nga mihilak.

Human sa kasal, gipig-it niya ang kamot ni Bartolo ug miingon, “Di mo ba lang diay ipaila-ila kanako ang imong asawa, Bartolo?”

“Glad to introduce to you, Lisaper, Nancy Eredia, ang bag-ong natudlo nga rural nurse dinhi sa lungsod sa San Fernando.’

Nahimut-okan sa makadiyot si Sister Lisaper. “Hinaot unta, Bartolo ug Nancy, nga sa umaabot mga adlaw magmalipayon sa inyong pagpuyo. Iuban ko kamo sa akong panalangin isip usa ka suluguon sa Diyos!”

Wa kapugngi ni Bartolo ang pagdanguyngoy. Iyang gigakos si Lisaper. Tuyo lang niya nga ipabati niini ang kamingaw ug kailiw sa kanhi niyang hinigugma.

KILUMKILOM NA. Di madugay tukbon na sa kangitngit ang kinaiyahan inig-abot sa kagabhion. Gipahiran ni Sister Lisaper sa iyang panyo ang iyang mga luha nga wa niya himatikdin nga nang­lugmaw sa iyang mga mata. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph