Sugilanon: Si Alipio kulhanon

Rey M. Alegado

Ibo, Lapu-Lapu City

KAABURIDO ang naghari sa utok ni Alipio. Kasamok sa iyang hunahuna nga wala hisabti ang hinungdan. Bisan giunsa niya pagnayanaya ang iyang kaugalingon dili gayud mahanaw ang iyang gibati. Naghiwasa siya. May kalagot sa iyang kaugalingon nga siya lang ang nasayod sa hinungdan.

“Grabe na man sab ka, Alipio. Bisan unsa na lang akong gibuhat aron makuha ko ang imong pagtagad, wala man lang nimo pataling­hugi ang tanan. Bisan asa ka ibutang, sa trabaho man o sa babaye, hinay ka gayud kaayo! Maayo lang ka sa esturya!” ni Mavel usa

ka higayon niana didto sa canteen sa kompaniya nga ilang gitrabahoan.

Wala lang motimang si Alipio bahin sa gipanulti ni Mavel, bisan sakit sa iyang buot ang maong mga pulong.

Kauban sa trabaho sila si Mavel ug Alipio. Sa kinse ka tuig nilang pag-alagad sa kompaniya, wala gayud mamugna ang ilang relasyon sa pagsinabtanay sa pulong ‘gugma.’

Igo lang sila sa pag-admire sa usag-usa, pag-selos ug pag-care. Kay wala man makapadayag si Alipio sa iyang gugma ngadto sa dalaga. Ma­ngibog, unya dili kaingon.

Gibiaybiay lang hinuon siya sa iyang mga kauban sa trabaho nga ‘sige og sikit sa dili uyabl’ Sakit alang kaniya ang maong sitwasyon. Wala malilong sa mga mata sa mga tawo nga naibog ug nahigugma gayud siya kang Mavel. Dili tiaw ang pagbati niya kang Mavel.

Giapil na gani niya kini sa iyang pangaliyupo ug pag-ampo sa Labaw nga Makagagahom nga iya na untang ikapadayag ang iyang gugma ngadto kang Mavel. Si Mavel na ang babaye nga iyang dad-on sa altar sa kaminyuon. Ug maoy saligan sa iyang gugma.

“Naunsa ka na god, Alipio? Bisan asa ka ibutang, pakapaka man lang ang imong inamang.

Mahumod man lang imong simod kon mayab-an og kinilis. Ambot nimo, uy!” komedya ni Mavel.

Apan sakit sa iyang galamhan ang maong mga pulong. Igo lang siyang mingislit.

Usa ka higayon niana nag-abot silang Ma­vel ug Alipio sa canteen atol nga tinggawas na sila sa ilang trabaho. ‘Off duty’ na sila. Nakahukom na si Alipio nga ning higayuna ilibkas na gayud sa iyang mga ngabil ang pag-ingon kang Mavel, pagpadayag sa iyang gugma ngadto niini. Kay dili tiaw ang iyang gibati nga kahaw-ang nga siya mag-inusara.

Gamiton niya karon ang mga pulong nga gitudlo sa iyang Lolo kaniadto sa buhi pa kini, “Basta dili ka makapadayag sa imong gibati ngadto sa babaye, gamita lang ang duha ka pulong: Pastilan ug Porbida.”

Samtang sila nag-inom og coke, may gisulti si Alipio sa dalaga.

“Vel, pastilan...!” ni Alipio.

“Unsa goy pastilan, Alipio?” ni Mavel.

“Porbida...!” naglingo-lingo si Alipio nga mitutok sa dalaga.

“Unsa goy porbida?” ni Mavel nga nagpahiyom kay nakasabot sa buot ipasabot ni Alipio.

“Mao ra na ang mga pulong nga imong nahibaw-an? Nganong karon pa man na nimo isulti? Dugay na kaayo kong nagpaabot ana! Sige na lang. Oo na lang ko nimo!”

Wala kapugong si Alipio sa iyang gibati pagkadungog niya sa tubag ni Mavel. Mitindog siya ug gigakos si Mavel og hugot. Wala niya panumbalinga ang mga tawo nga diha sa canteen nga nagtan-aw kanila niadtong orasa. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph