Sugilanon: Si Manoy Rikrik

Eliza Arisgado

Cebu City

“NAY Petra!” sangpit ni Insyang sa iyang inahan. “Tinuod nga mouli na si Manoy Rik­rik?”

“Oo, Syang. Nagpadala siya og suwat gikan sa Japan. Musta na kaha ang imong manoy, no? Lima gyud siya ka tuig didto sa Japan,” ni Petra.

“Mao ba, Nay? Naghinam-hinam gyud ko sa iyang pag-abot. Unsa kahay hinabuan o pa­sa­lubong ni Manoy Rikrik sa akoa? Naa na man koy laptop ug selpon,” ni Insyang.

“Saba ka diha! Mga butang ra diay imong gipaabot, dili diay ang imong igsuon? Gimingaw na intawon kami si Tatay Pepe ninyo sa imong maguwang,” sulti ni Petra sa iyang anak.

Niabot ang adlaw sa pagpauli ni Manoy Rikrik. Nangadto sila sa Mactan-Cebu International Airport aron sugaton ang maguwang ni Insyang.

Naghinam-hinam na silang makita kini, kay lima ka tuig nga nahilayo kanila tu­ngod sa pagpanarbaho didto sa gawas. Halos duha sila ka oras nga nagpaabot apan wa sila batia og kakapoy.

“Unsang orasa man ang gisulti ni Manoy, Nay?” ni Insyang nga morag gilaayan na sa pagpinaabot.

“Alas tres man kuno. Apan hapit na man alas tres-imedya wa pa man gihapon.” tubag ni Petra nga milingi kang Pepe.

“Ania ra, nagteks na si Rikrik, Petra,” sulti ni Pepe.

“Unsa may sulti, Tay?”

“’Duol na ko. Paabota lang ko diha. Daghan kaayo kog dala. Naglisod ko. Gimingaw na kaayo ko ninyo.’ Mao na ang teks niya.”

“Hala! Daghan gyud diay kog pasalubong, Tay, Nay!” malipayong misulti si Insyang nga nagkatawa.

Apan kalit lang silang nahunong og estor­yahanay dihang may babayeng miduol kanila.

“Saba ka diha, Inocencia!” matod sa seksi kaayong babaye nga nagpahiyom kang Insyang.

“Kinsa na siya? Kaila nimo, Syang?” pangu­tana ni Petra nunot ang pagsiko kang Pepe.

“Dili, Nay, di nako siya kaila,” ni Insyang nga miatubang sa seksi nga babaye.

“Nakaila ka nako, Miss?” ni Insyang nga nahibulong.

“Aysus, ako ni uy, si Manoy Rikrik nimo!” pinaluray nga tubag sa babaye nga mitan-aw kang Petra ug kang Pepe. “Nay, Tay, ako na diay si Patricia!” mapahiyomong sulti sa seksing babaye.

“U-Unsa? Ikaw si Patricio?” nagkadungang sukna nilang Pepe ug Petra.

“Rikrik, kahibawo kong may pagka babayen-on ka, apan wa ko damha nga mosangpot ka sa ing-ani nga sitwasyon,” matod ni Pepe nga mitutok sa anak.

“Oo lagi, Tay. Apan wa ko kapugngi akong kaugalingon didto sa Japan. Nakaamiga kog parehas nakog dugo. Ingon ani lang gyud ko Tay, Pasayloa ko sa akong gibuhat.” Kahilakon nga nagsaysay sa iyang kaagi si Manoy Rikrik.

“Bisag unsa pay sayop mo, anak. Bisan unsa pay himuon mo, pasayluon ko gihapon ikaw, kay ikaw akong anak,” sulti sa amahan dayong gakos kang Rikrik. “Sugod karon di na ko mopugong nimo, basta likayi lang ang dautan.”

“Nakugang gyud ko, anak, apan adto na ta mag-estorya sa balay. Tana uli usa ta!” sugyot ni Petra.

Wa na makugang ang mga silingan nila ni Insyang sa nahitabo sa iyang Manoy Rikrik tungod kay sa bata pa bayoti na kining daan. Ug sa wa pa kini molarga sa gawas binabaye na kining manglihok-lihok. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph