Sumbagay nah!

BINAHARAY diri binaharay didto ang nahimong senaryo kagahapon atol sa official weigh-in sa “Pinoy Pride XX: Labang Kung Laban” boxing promotion sa SM City Entertainment Center.

Kon mao kini ang nahitabo sa weigh-in, unsa na kaha inig abot na nila ni Filipino Jason Pagara (30-2, 19KOs) ug Mexican Aaron Herrera (25-1, 17KOs) ibabaw sa ring karong gabii sa main event sa promosyon sa Waterfront Hotel sa Lahug, Cebu City.

u201cA knockout will come in any round,” matod ni Herrera, kinsa mitimbang og 139 ½ pounds.

Si Herrera, kinsa mosuway pag-ilog sa World Boxing Organization (WBO) International light welterweight title ni Pagara, tataw nga dako kaayo og pagsalig sa iyang kaugalingon nga madala niya ang korona sa iyang pagbalik sa Mexico.

Dihang nagpahulagway ang duha ka mga boksidor, gipakita ni Herrera ang muscle sa iyang bukton ngadto kang Pagara nga klarong dala palagot.

Apan matod ni Pagara nga wala siya naapektuhan sa mga diskarte ni Herrera.

u201cPsywar ra nang iyaha. Tan-awon lang unya nato inig abot namo sa ring. Basta naa gyu’y mahitabo nga knockout ani,” matod ni Pagara, kinsa mitimbang og 139 pounds.

Ang manager ni Pagara nga si ALA Promotions president Michael Aldeguer nagkanayon nga kining awaya mao ang magsilbing basihan kon unsa’y puwedeng maabot sa boxing career sa lumad nga taga Cagayan de Oro City.

u201cThis is a dangerous fight for Pagara. This is his defining moment,” matod ni Aldeguer.

Gitataw ni Aldeguer nga kon modaog si Pagara ning awaya, hayan mag-training kini sa Amerika alang sa mas dagkong away sa umaabot.

Sa iyang bahin, padayon ang laing ALA fighter nga si Jimrex “Excutioner” Jaca (37-6-3, 21KOs) sa pagpanikaysikay aron makakuha pagbalik og dakong away.

Sa top supporting bout, si Jaca makigbatok sa laing Mexican nga si Jose Emilio Perea (29-2, 20KOs) alang sa inilugay sa bakanteng WBO Oriental light welterweight title.

Sa laing gikaintapang away, ang wala’y pildeng ALA fighter nga si Genesis “Azukal” Servania (19-0, 7 KO’s) makigharong kang Indonesian Isaac Junior (20-3-2, 8 KO’s).

Magsukmagay sab sila si Ralph Lulu batok Junnie Salogaol, Roland Servania batok Andrew Palas, Elmo Traya batok Jonie Villacrusis, Richard Barrios batok Lauro Balweg, ug Kazuma Ejiri batok Jonas Sultan.

Gilaumang mokawat og atensyon ang pagsaka sa dekalidad nga amateur boxer nga si Jessel Magsayo sa professional rank.

Sa labing una niyang away sa professional rank, si Magsayo makigharong kang Melton Sandal sa Zamboanga del Norte.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph