USA ka sundalo ug laing duha ka mga kauban niini gisikop sa kapulisan human gireklamong nanion og pusil didto sa dalang Quirante II, Barangay Magugpo Poblacion, dakbayan sa Tagum, Sabado sa hapon.
Nailhan ang mga dinakpan nga sila si Private First Class Haron Rajumuda 29, Arellano Caragda 29, ug si Capelianes Mangandan, hamtung ang panuigon.
Sa report gikan sa Tagum City Police Station nasayran nga pasado alas 2:00 sa hapon, nasikop sa mga miresponding pulis ang tulo ka mga suspetsado human nila gitionan og pusil ang anak sa usa ka tunnel financier nga si John Rex Mabuntad, 18, molupyo sa Barangay Manlamodaw, lungsod sa Maco Comval, atubangan sa may Nomens Gold Smith sa maong dapit.
Sigun sa biktima nga gitionan siya og armas, buot nga i-hostage, ug gipugos nga itug-an ang nahimutangan sa iyang inahan nga bag-o lamang nagpisar og bulawan.
Dugang ni Mabuntad nga gipasakay siya og motor sa mga suspek ug gilibot-libot, apan maayo na lamang nga nakapangayo siya og tabang ug nasikop ang mga suspek.
Nagtuo si Mabuntad nga dunay dautang tuyo ang mga suspek sa iyang inahan tungod kay naghupot kini og kwarta nga halin sa pagbaligya og bulawan.
Ang tulo gipaslak na karon sulod sa selda sa Tagum City Police Station.
Kapulisan mihimo na og pakisusi sa hitabo. (Marvin Pineda)