Sundalo ug pulis positibo nga naka-pabuto og armas

POSITIBO sa paraffin test ang opisyal sa militar ug usa ka pulis sa nahitabong pinusilay niadtong 9:20 sa gabii sa Sabado didto sa probinsiya sa Cotabato nga gikamatay sa usa ka tenyente nga sundalo nga si Diomedes Felix De Guzman kinsa sakop sa 7th Infantry Battalion (7th IB) sa Philippine Army.

Gikanayon ni alyas Sammy (bansagon gitago gumikan sa seguridad), usa ka balot vendor, nga nagsinggit-singgit si Captain Orlando Barrera, sakop sa 7th Infantry IB nga mora og namaligya og balot.

"...nga balot-balot sino bibili masarap ito, pare. Balot balot kayo dyan," atbang sa municipal Plaza sa Barangay Poblacion, Pikit.

Akto nga miagi si Police Officer 3 Samson Otoc nga sakop sa intelligence unit sa Cotabato Police Provincial Office (CPPO) nga sakay sa iyang motorsiklo nga impluwensiyado sa ilimnong makahubog.

Sa pagtuo nga siya ang gisinggitan, iyang giduol si Barrera ug gikomprontasi hinungdan sa ilang panaglalis.

Sa diha nga nakit-an ni De Guzman, misulay siya pag-uwang sa duruha apan kalit lang milanog ang duha ka buto sa armas ug natumba ang biktima nga naligo na sa iyang dugo.

Si De Guzman nakahiagum og samad sa ulo ug dughan.

Nadala pa sa Kidapawan Medical Speacialist Hospital si De Guzman apan hingkabsan siya sa iyang kinabuhi.

Gibalhog si Otoc sa selda sa Pikit PNP samtang si Barrera gikostudiya ni 7th IB Commander Colonel Benjie Hao.

Hangtud karon wala pay gipagawas nga resulta ang PNP Crime Laboratory sa ballistic examination sa mga armas kon si kinsa kanila ni Barrera ug Otoc ang nakaigo kang De Guzman hinungdan sa iyang kamatayon.

Gitataw hinuon ni Cotabato PNP Provincial director Senior Superintendent Cornelio Salinas nga isolated incident lamang ang nahitabo ug dili makaapekto sa relasyon sa mga pulis ug sundalo sa maong probinsiya nga padayong nag-imbestiga niini. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph