Sun.Star mitabang pagpanalipod sa Davao Gulf

MGA opisyales sa Sun.Star Davao mipartisipar niadtong Dominggo sa pagtanom sa 3,000 ka mga seedlings atol sa mangrove tree planting activity didto sa Purok Pisces, Barangay Lasang, siyudad sa Davao.

Ang grupo gipangulohan ni Sun.Star general manager Tessie A. Paña padayong mipatuman sa ilang corporate social responsibility (CSR) project.

Ang mangrove tree planting gi-organisa Save Davao Gulf Foundation, Inc. (SDGFI) ug gisuportahan sa Globe Telecom.

Ang Sun.Star Davao, isip usa sa mga mipartisipar sa aktibidad, anaa na sa ika-upat ka tuig nga pagpatuman sa CSR program sukad gilusad ang Adopt-A-Site project niadtong 2011.

Ang kompanya nag-alokar og pundo alang sa pagtanom ug pagmentinar sa prutas (fruit-bearing trees) nga gitanom sa Talomo-Lipadas wateshed area sa Sitio Saro, Barang Manuel Guianga, Tugbok District.

Si Paña nagsulti nga ilang suporta sa Greening Program sa gobyerno magpadayon sanglit matinud-anon ang Sun.Star sa pag-amuma sa kinaiyahan.

Miasistar sab sila Human Resource supervisor Vic Purgatorio, Newsroom supervisor Donna Cuyos, Credit and Collection supervisor Leo Ocot, Circulation supervisor John Darwin Kapaw-an, Production supervisor Raymundo Dumagunot, Sun.Star Superbalita managing editor Alger Dura, ug photographer King Rodriguez.

Sa hamubong programa sa lugar, si SDGFI president ug Councilor Leonardo R. Avila III nagsulti nga nakigtambayayong sila sa Department of Environment and Natural Resources aron tugotan sila ug ilang partner nga institusyon nga maglusad og mangrove tree planting activity sa Barangay Lasang.

Iyang gipasalamatan ang Globe Telecom ug Sun.Star Davao sa pagsuporta sa ilang kampanya nga panalipdan ang Davao Gulf.

Gipasabot ni Avila sa mga mananagat atol sa aktibidad nga aron mapanalipdan ang Davao gulf, kinahanglan nga unang panalipdan ang kabukiran pinaagi sa pagtanom og mga kahoy.

Iya sab gipahibalo ang mga mananagat nga nagtinabangay sila karon sa 18 ka mga municipal ug city mayors sud sa Davao gulf area aron makabaton og maayong programa nga magprotiher sa kadagatan.

Si Barangay Lasang kagawad Nestor Gabronino nagkanayon nga ang barangay council mapasalamaton tungod kay gipili isip benepisyaryo ang ilang barangay sa maong proyekto.

"Nagpasalamat mi sa Save Davao Gulf Foundation, Globe Telecom, Sun.Star Davao, City Agriculture Office, ug miyembro ug opisyales sa Nagkahiusang Gagmay nga Mananagat sa Barangay Lasang sa pagtabang namo nga panalipdan ang bakhawan," suma ni Gabronino.

Si Globe's Safety, Health and Environment Program expert Bernadeth Jimenez nagkanayon nga nalipay sila tungod kay ang mangove seedlings nga gitanom sa miaging tuig giamuma sa asosasyon.

"Masaya kami dahil nakikita namin na inaalagan talaga ninyo," suma ni Jimenez kinsa midugang nga magpadayon ang programa uban sa Davao Gulf Foundation. (Alger P. Dura)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph