Suspek nga 'bigtime drug dealer' sikpaw

KABACAN, North Cotabato -- Nasignit sa otoridad ang usa ka suspek nga big-time drug dealer sa alas 10:05 sa buntag niadtong Huwebes.

Giila ang dinakpan nga si Abubakar Abdul Mantis, alyas Manong, molupyo sa Barangay Kayaga, Kabacan.

Matud ni North Cotabato Provincial Police Office Director Danilo Peralta nga gironda sa mga ginsakpan sa Criminal Investigation and Detection Group-Cotabato ang bay ni Mantis base sa search warrant nga giisyu ni Regional Trial Court 12, Branch 22 Judge Laureano Alzate.

Wala na maka-alma si Mantis sa diha nga napalibutan na sa mga pulis ang iyang balay.

Nakuha sulod sa gipuy-an ni Mantis ang tulo ka granada, usa ka kalibre .45 nga pistola, usa ka 357 revolver, shotgun, mga bala, kagamitan sa druga ug dili matino nga gidaghanon sa shabu.

Nasayran nga dugay na nga gitiktikan sa mga otoridad ang suspek nga nalambigit sa pagpayuhot sa gidiling druga.

Nagtuo si Peralta nga big-time drug dealer si Mantis gumikan dagkong personalidad sa mga drug traffickers ang nagsuplay og druga kaniya.

Sa pagsulat ning balita, padayon nga gisukitsukit si Mantis sa kapulisan aron mokanta ug itudlo niya ang uban pa niyang kaubanan nga tigpayuhot og druga.

Gibalhog na siya sa prisuhan sa kapulisan. (Edgar E. Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph