NAKABSAN gyod sa iyang kinabuhi sulod sa Northern Mindanao Medical Center (NMMC) ang gituohang sakop sa laing duha ka mga tulisan nga napatay sa pinusilay niadtong niaging semana sa Adela Subdivision, Barangay Camaman-an, siyudad sa Cagayan de Oro.
Si Gilbert Poras, lumad nga taga Tubod, Lanao del Norte, ang nakabsan gyod sa iyang kinabuhi niadtong Martes.
Gituohang wala naagwanta sa biktima ang ubay-ubay ka mga samad sa iyang lawas ug taliwala gipaubos na sa operasyon, pabilin sa talandugon ang kahimtang.
Gani sa pagsusi sa Sun.Star SuperBalita, niini sa naasoy’ng tambalanan kanunay kining ibalhin tungod sa kondisyon niini sa lawas. Uwahi gibutang ang biktima sa intensive care unit.
Ang pamilya usab niini wala na mihatag og pahayag. Sa pagsulat ning balita, gidala na ang patay’ng lawas niini sa Bollozos funeral parlor diin kagahapon sa hapon gikatakdang ibiyahe sa pamilya niini ang patay’ng lawas.
Daw giingon sa pamilya nga itugyan na lamang nila sa kapolisan nga maoy niimbistigar ang kaso niini ug naghinaot nga taliwala sa giingong kalambigitan sa biktima makab-ot niini ang hustisya.
Si Poras ang giingong kauban niadtong duha ka mga gitouhang tulisan nga namatay sa pinusila human misuway og tulis sa Gob Store sa Camaman-an.
Ang mga unang namatay giilang sila si Virgilio Elarcosa ug June Antis, taga Maigo, Lanao del Norte ug Digos, Davao del Sur.
Sa pagkakaron blanko gihapon ang kapolisan kinsa ang naengkwentro sa maong gituohang mga tulisan. (SVB)