SA KASAMTANGAN, nagtudlo ako sa subject nga Humanities sa Aces Polytechnic College sa Panabo, Davao del Norte. I'm so happy kay ang subject description "Arts Appreciation." Of course, ang tulo ka sanga sa Humanities (Fine, Performing ug Practical Arts) ang among tun-an.
Ang Humanities gikan sa Latin word nga "Humanus" kun human (tawo). Yes, ang sentro sa among pagtuon mao ang "tawo." Ang kalainan lang ani sa Science ug Math, wala kiniy ginasunod nga formula ug equation. Ang subject nga Humanities nagatala ug nagapasabot sa panghuna-huna, pagbati ug nagatambag pod kini kanato kung unsay angayan ug dili hustong buhaton dinhi sa kalibutan.
"Art" kuno ang pinakauyukan sa pagtuon og Humanities diin lampas sa ordinaryong pagsabot ang gikinahanglan. Bitaw pod ning "Art" no? Lisud sabton. Naay tela nga gikuris-kurisan sa lapis ug mga pintura "Abstract Painting" na. Mahal ang presyo kon ibaligya bisan ang "artist" o pintor lang ang nasayod sa tinuod nga mensahe niini.
Matud pa ni St. Thomas Aquinas, "Art is the opposite of the practical. It is concerned with things that live beyond matters." Meaning, dili diay ang adlaw-adlaw nato nga bisti, kuwarta, pagkaon ug ubang panginahanglan ang ginalantaw "lang" niini apan kadtong mga matang nga mas lawom pa niini. Wow! That's deep!
Bantog ra ang mga artist lisud sabton kay lawom diay ang ginakuhaan sa ilang inspirasyon. Gani ginatawag sila nga "weird" kay lagi dili nato "ka-level" ug panghuna-huna. Kung si Nef Luczon pa ang paistoryahon, "dili weird apan deviant kuno ang mga sama nila." Deviant kay naga-deviate o nagalihay sa natural nga pamaagi. Mora'g nasaag ba! Apan pamaagi daw kini sa pag-"express" sa mga kaugalingon nila.
Ang expression sa Art makita sa sinugdanan ug katapusan sa atong mga kinabuhi. Tanan actually- konektado niini. Adunay Art of War, Leadership, Money-Making, Relationship, Cooking, Dancing, Living ug damo pa. Sa nagkadaiyang kultura ug sinultihan, lain-laing pamaagi ang atong ginabuhat aron ipahibalo ang unod sa atong dughan; ang atong baruganan.
Sa uban dali apan sa kadaghanan, dili lalim ang pagbarog sa isyu nga atong ginaatubang. Ayaw ka tingala kay nagapanghitabo na kini sa una pa. Kung dili mauyonan sa kadaghanan ang imong ideya - okay lang kay kung Art ang hisgutan - "you are just taking a stand" ug dili kana crime.