Talk to Papa Joe: Mata og morning

DEAR Papa Joe,

Ako diay si Albert, 34, naa sa Cebu karon pero taga Mindanao gyud ko. Ang akong problema mahitungod sa akong asawa nga naay iring-iring. Tigbyahe man gud ko kay mao na akong trabaho. Daghan na kaayo ko og estorya nga nadunggan sa iyang kalaki pero wala gyud nako masakpi. Karon, naglibog ko. Basin ug tinuod kay bati na man siya og tinagdan nako. Unya kon mag-away mi, dali kaayo siya makaingon nga buwag mi. Unya naa baya miy mga anak.

Ang nakapait sad kay makadawat ko og text sa mga concern lang kuno nga ang akong mga anak di gyud ako kay wa gyud maliwat daw nako bisan gamay. Usa ka higayon ana, Papa Joe, naay ni-text nako nga naay kuyog ang akong asawa nga lain unya naa ko sa Siquijor ato byahi. So, akong gitawgan akong asawa ug sa kadugayan nitug an siya nga naa siyay kuyog nga lalake apan classmate daw niya ug business ra iyang relasyon.

Sa akong kalagot kay wa ko motuo, gibaharan nako siya nga patyon unyag uli nako pero unsa mang unsaa nga di man nako kaya masuko kay buwagan man dayon ko niya. Unya di baya nako kaya nga mawala siya. Galibog gyud ko ron unsay buhaton kay kataw-an lang ko

sa akong kaliwat nga nagmata ra daw ko og morning. Unsa kaha og tinuod ni tanan.

Manimalos ba ko ug maghikog na lang? Palihug tambagi ko.

ALBERT

Albert,

Bay, ako pa nimo, panid-an nimo og tarong imong asawa nga di ka magpahibawo. Samot nga biyahe biahe imong trabaho. Ingnon lang nimo na nga byahe ka pero nipalta diay ka sa tinuod. So, masakpan gyud nimo kon naa man. Kon sayop man gani, bawia pina gi sa maayong buhat. Apan kon tinuod man, ayaw ibutang ang balaod sa imong kamot kay luoy ang mga bata.

Basin sad tuod tungod sa biyahe biyahe nimo, nawad-an na kag time niya mao nga ingon ana na siya. Regarding sa sa imong mga anak, kon naa kay kwarta, ipa DNA para klaro ug wala nay duda-duda. Kon dili imo, pwede sad nimo pasakahan og kaso imong asawa.

Sa kaminyuon man gud, Bro, kinahanglan gyud ta og time. Kon wala, na, bungkag ang relasyon. Unya ayaw padala sad dayon sa mga sumbong sa mga tawo nga di kamao mobarog sa ilang sumbong. Mga tawo nga panaot ray nahibaw-an kay basin usa sad na sa nakapabugnaw sa imong asawa nga imbis sa iyaha ka maminaw, mas gihatagan nimo og gibug-aton ang mga sumbong. Ana lang. Daghang salamat sa imong tampo. God Bless.

PAPA JOE

(sa inyong tampo ipadala sa papajoelon@hotmail.ph o joelonrt@hotmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph