DEAR Papa Joe,
Ako si Elaine, 30 years old, daga. Nahadiin diin nalang ko og trabaho, diri sa ato o sa gawas, pero wala gihapon ko kakita og asenso. Ako man guy nagbuhi sa among pamilya kay pobre mi. Si Mama labandera ug si Papa mananagat sa among probinsya.
Sa akong edad makaingon ta ko og pwede nga moasenso, pero di. Pagkabata pa nako, dihang nakabaton ko og buot mga 9-anyos ko, dako na ko og ambisyon tungod lagi kay pobre mi ug nag-inusara pa ko. Pero sa dihang namanghuran ko, nagsugod na ang kalbaryo. Kuwangon pa gani sa kaon. Maayo unta og usa lang ka manghod ang nagsunodsunod, unom ka buok. Didto nahanaw akong damgo kay kinahanglan ko nga motabang sa akong mga ginikanan.
Sa edad nga 15, nisulod na ko isip katabang sa balay hangtod karon. Ako na ang nagpa eskwela sa akong mga manghud nga mga high school na ug college. Dako akong pagmahay sa akong mga ginikanan tungod sa pagpatuyang nila og panganak nga di nila kaya ug ako ang nagsakripisyo tungod kay ako ang nagtiwas sa ilang obligasyon ug ako na hinuon ang wa makabaton og kalipay na sa tan-aw pa nako, ma guwang dalaga na lang ko. Unsa man akong buhaton? Undangon ba ko ni? Tambagi ko.
ELAINE
Elaine,
Di ko kapugong sa mga pagbasol nimo sa imong ginikanan tungod kay nasakripisyo ang imong kaugalingong kalipay. Pero hinumdumi nga wala sad na sila magdahum nga mao nay linugdangan sa ilang gibuhat, ang di maka-provide sa ilang mga anak tungod sa kadaghan. Sa pagtuo man gud sa uban nga mabuhi ra ang tawo, kay ang langgam man gani mabuhi man. Pero ang tawo nagkinahanglan og trabaho para makakwarta ug mo-survive.
Mao na ni ang sitwasyon nato karon sa Pilipinas, daghang tawo, kuwang sa trabaho o kon naay trabaho, di madawat ang uban tungod kay wa nakapasar kay wa sa ila ang gipangita sa trabahuan.
Pwede man ka malipay. Time manangement lang ug pangita og lalaki nga mosabot nimo sa pagsuporta nimo sa imong mga igsuon. O kaha ang nag college puli-puli sa og trabaho sama sa imong gibuhat para makaabag. Nakaya man gani nimo nga ikaw ra. Pray to God kay may kasulbaran ra.
PAPA JOE
(sa inyong tampo ipadala sa papajoelon@hotmail.ph)