Tambagi ko Noy Kulas: Bisan abusado

DEAR Noy kulas,

Ako si Inday. Nagtrabaho ko sa una sa Minglanilla. Sa una, sa wa pako nag boarding house, mag-ulian ko pinaagi sa pagsakay sa usa ka bus nagbiyahe og Naga to SM. Sa sige nakog sakay, nakaila nako ang ulitawo nga conduktor sa bus. Unya sa sige niya og tan-aw nako, nangayo siya og numero. Sa dihang ako siyang gihatagan, nanguyab siya nako.

Apan ako siyang gibuwagan kay naibog ko sa iyang kauban nga usa ka minyo.

Wa damha, nag boarding house ko tungod kay gihatagan kog allowance sa akong gitrabahoan nga kompaniya. Niipon siya nako. Sa panag-ipon namo og tulo ka buwan, nakita na namo ang usag usa nga batasan. Wa ko nagtuo nga ingon ana diay siya ka salbahis. Nagtuo ko nga buotan kay di makita sa iyang nawong.

Hatagan nako siya sa iyang gusto. Makakaon siya og lami pinaagi sa akong pinangkamotan. Sa dihang ni-close na ang akong gitrabahoan, uyab gihapon mi uyab.

Adtong July nahibaw-an nako nga mabdos na diay ko ug siya ang amahan sa akong gisabak.

Maayo pa kaayo to siya. Pag-August wa na ko kapugong kay gipamalikas naman ko niya.

Iya kong gibun-og. Daghan ko og lagom. Iyang gipatiran akong tiyan ug nagsige ko og bleeding. Sige siya og ingon nga di ni iyang anak kay tuko daw. Bisan gisigihan ko og bun-og niya, nakigbalik gihapon ko niya but pagkadugayan ako na gyud siyang gibuwagan.

Grabe ko ka inlove niya kay birthday sa iyang mga anak, maghatag ko og regalo. Di lang kay senina, hatagan pa nako siya og kwarta para pang-celebrate. Unya sa iyang birthday, ako pa ang mogasto. Ako lang gihapon siyang love bisag giingon ana ko niya.

Nganong di man siya mawala sa akong huna-huna, Noy? Unsa may angay kong buhaton nga mawala siya nako? Kahibawo na baya ang iyang asawa nga naa siya uyab!

INDAY

Inday,

Di na lang ta mag-analyze nganong ingon ana ang imong gibati niya. Ang importante karon nga nagbuwag na mong duha. Ang imong hukom maayo kaayo ug makaayo kaayo nimo.

Kay ang imong gipuy-an impiyerno. Nakig-uban ka og minyo nga lalake nga di gyud maimoha. Minyo na man gud siya. Lisod nang mahitabo nga maimoha siya.

Iya kang giabusahan. Wa siyay respeto nimo. Sa ato pa, kay wa siyay respeto nimo, di gugma ang iyaha diha nimo, kon di uwag lang gyud. Iya ka lang gigamit kay modatong man ka niya. Nindot kay naa pa siyay batan-ong babaye nga dalaga, naa pa siyay tinubdan sa kuwarta. Mao nay giingon nga “hitting two birds with one stone.”

Kining imong desisyon karon maoy maghatag kanimo og kalipay sa umaabot nga adlaw. Kay nagbalik kini sa imong dignidad isip babaye nga marespetuhan sa mga lalake. Sa imo man gung gibuhat, moubos gyud ang imong dignidad ug self-worth kay mahug ka man lang nga no. 2 sa mao nga lalake. Unya ang nakapait, kay di pa gyud siya worth sa imong unconditional ug undying love. Mamun-og pa gud siya. Nangabuso siya nimo physically, psychologically and emotionally. Busa, di gyud siya angay sa gugmang imong gihatag ngadto kaniya.

Pag-ampo kanunay sa Ginuo nga hatagan ka niyag kalig-on aron ka maka-resist sa tentasyon.

NOY KULAS

Alang sa imong problema, e-mail lang sa: kulassuper@sunstar.com.ph o sa rojval69@yahoo.com. Suwat sab sa: Tambagi Ko, Noy Kulas, Sun.Star bldg., P. del Rosario st., Cebu city

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph